Ичинде 133 миллиард долларга жакын алтын бар делген "Дмитрий Донской" кемеси табылды

Түштүк Кореялык адистер мындан 113 жыл мурун чөгүп кеткен орусияга таандык "Дмитрий Донской" крейсерин таап алышты. Бул тууралуу япониялык маалымат каражаттары жазууда.

Маалыматка ылайык, аталган крейсер Орус-Япон согушу учурунда 1904-1905-жылдары колдонулган. Кемени "Shinil Group" кеме куруучу корпорациясынын адистери табышкан. Крейсер Түштүк Кореяга таандык Уллындо аралына жакын жерден табылган.

"Биз кемени 434 метр тереңдиктен таптык. Кемеде "Дмитрий Донской" деген жазуу сакталып калыптыр" деп билдиришкен адистер.

Жакынкы күндөрү адистер кемени сактап калуу боюнча иштерин баштай тургандыгын кошумчалашкан.

"Дмитрий Донской" кемеси сууга 1883-жылы коё берилген. Согуштук кармаштан соң Владивостокко багыт алган, бирок Япон кемелери артынан жетип келип крейсерди курчоого алышкан. Душманга жеңилип берүүнү каалабаган экипаж мүчөсү аны чөктүрүп жиберүүнү чечкен.

Айтылып калган маалыматтарга караганда, аталган кемеде алтын тыйындар салынган бир нече сандык болгон. Азыркы тапта алардын баасы 133 миллиард долларга жетиши мүмкүн. Дал ушул маалыматты кореялык адистер текшерүүнүн алдында турат.