Футбол боюнча "Надежда" аттуу кыздар арасындагы эл аралык мелдеште Кыргыз курамасы 3-орунду ээлеп калды

Бүгүн, 21-июлда Бишкек шаарындагы Дөлөн Өмүрзаков атындагы стадиондо футбол боюнча кыздар арасындагы "Надежда" аттуу эл аралык мелдеш жыйынтыкталды.

Анда акыркы 3-турдун алкагында Тажикстан-Казакстан жана Кыргыз-Өзбекстан беттештери орун алды.

Тажикстан менен Казакстан курамаларынын беттеши 0:4 эсеби менен жыйынтыкталды. Оюндун жүрүшүндө казакстандык Эльдана Айтимбетова 47 жана 59-мүнөттөрдө айырмаланса, 74-мүнөттө Александра Бурова жана 80-мүнөттө Дильназ Жакиева гол киргизишип командасына жеңиш алып кетти.

Кыргыз-Өзбекстан беттешинин жүрүшүндө алгачкы голду өзбекстандык Камола Эркинова 8-мүнөттө киргизип, 10-мүнөттө Ойсара Сүйүнова эсепти 0:2 кылып командасын алдыга чыгарды. 28-мүнөттө Толгонай Алмазбекова айырмаланып эсепти 1:2 кылса, 52-мүнөттө эсепти 2:2 кылып кетти. Муну менен 0:2 эсебинде утулуп бара жаткан Кыргыз курамасы эсепти тең кылып атаандашына жеңишти берген жок.

Муну менен мелдештин жыйынтыгында 7 упайга ээ болгон Казакстан курама командасы 1-орунду ээлеп, 2-орунду Өзбекстан курамасы ээледи. Кыргыз курамасы 3-орунда жайгашса, 4-орунда Тажикстандын спортчулары болду.