Кырчын жайлоосунда жумушчулар IV-V кылымдарга таандык жоокердин көрүстөнүн таап алышты

Кырчын жайлоосунда жумушчулар IV-V кылымдарга таандык жоокердин көрүстөнүн таап алышты. Бул тууралуу Ысык-Көл облусунун администрациясынын басма сөз кызматы билдирди.

Маалыматка ылайык, Дүйнөлүк көчмөндөр оюндарына даярдык көрүлүп жаткан Кырчын жайлоосунда жумушчулар IV-V кылымдарга таандык жоокердин көрүстөнүн таап алышкан.

"Амфитеатр орун алчу жерде курулуш иштери жүрүп жаткан. Ал жакта мурун коргон сыяктуу курулуш бар болчу экен. Жумушчулар алгач эски ат жабдыктарын таап алышкан. Бул буюмдар табылган соң дароо Бишкектен окумуштуу-археологдорду чакырканбыз", - деп билдирди басма сөз кызматы.

Археологдор казуу иштерин улантып адамдын сөөктөрүнүн калдыктарын таап чыгышты. Алардын айтымында, аталган сөөктөр жана буюмдар IV-V кылымдарда жашап өткөн жоокерге таандык.

Казуу иштерин Улуттук илимдер академиясынын илимий кызматкерлери тарабынан жүргүзүлүүдө. Табылган бардык буюмдар музейге өткөрүп берилет.