ФИФА "Жылдын мыкты футболчусу" наамына ат салыша тургандардын атын атады

ФИФА "Жылдын мыкты футболчусу" наамына ат салыша тургандардын атын атады. Бул тууралуу федерациянын расмий баракчасына жарыяланды.

Жарыяланган маалыматка ылайык, "Жылдын мыкты футболчусу" наамына 10 оюнчу ат салышууда. Футболчулардын сап башында франциялык Антуан Гризманн, Килиан Мбаппе, Рафаэль Варан бар. Бельгиялык Эден Азар жана Кевин де Брёйне, англиялык Гарри Кейн, хорватиялык Лука Модрич жана египеттик Мохамед Салах тизмени толуктаган.

Ошондой эле 11 оюнчунун арасына аталган наамды акыркы жылдары жеңип келген Криштиану Роналду жана Лионель Месси кирген. Аталган тизмеде бразилиялык Неймардын жок экени көпчүлүктү таң калтырган.

Футболчуларды ФИФА тарабынан түзүлгөн өз мезгилинин мыкты оюнчулары саналган мурдагы футболчулар тандаган. Эми күйөрмандар, улуттук курама командалардын башкы машыктыруучулары, журналисттер татыктуу делген 3 футболчуну тандап алышат. Ал эми жеңүүчү 24-сентябрда Лондондо аныкталат.

Айта кетсек, 2016-жылдан тартып ФИФА жана France Football өзүнүн байгелерин өз-өзүнчө тапшырат. Мындан улам жеңүүчү "Алтын топко" эмес, "Жылдын мыкты оюнчусу" наамына ээ болот.