Жайкы Азия оюндарынын футбол боюнча мелдешинде кайрадан чүчү кулак аземи орун алып, анда Кыргыз курамасы туш болгон "E" тайпасына БАЭ кошулду

Бүгүн, 25-июлда Малайзиянын Куала-Лумпур шаарында Жайкы Азия оюндарында өтүүчү футбол боюнча мелдеште кайрадан чүчү кулак аземи орун алды. Бул тууралуу SUPER.KG порталына Кыргыз Республикасынын футбол федерациясынан билдиришти.

Буга чейин 5-июль күнү чүчү кулак аземи орун алып, анда Кыргыз курамасы "Е" тайпасына туш келип, Түштүк Корея, Малайзия жана Бахрейн курама командаларына туш болгон. Бирок уюштуруучулар чүчү кулакка БАЭ менен Палестина курамаларын кошпой калып, кайрадан чүчү кулак өткөрүштү. Анда БАЭ курамасы "Е" тайпасына кирип, Палестина "А" тайпасына кирди.

18-августтан 2-сентябрга чейин Индонезияда өтө турган Жайкы Азия оюндарында футбол боюнча мелдеште 26 курама команда 6 тайпага бөлүнгөн. Анда Игорь Кудренко баштаган Кыргыз олимпиадалык курамасы "Е" тайпасына туш келип, Түштүк Корея, Малайзия, Бахрейн жана БАЭ курама командалары менен кез келет.

Айта кетсек, футбол боюнча олимпиадалык курама командасына 23 жашка чейинки спортчулар жана 23 жаштан жогору 3 спортчу гана кирет.

Кыргыз олимпиадалык командасынын курамы:

• Дарбазачылар: Кутман Кадырбеков, Калысбек Акималиев, Арстанбек Кудайбердиев;
• Коргоочулар: Айзар Aкматов, Давлятжан Баратов, Андрей Долженко, Бахтияр Дүйшөбеков, Темирлан Kозубаев, Аманбек Маныбеков, Азат Мурзашев, Аскарбек Салиев, Камолидин Ташиев, Мустафа Юсупов;
• Жарым коргоочулар: Одилжон Aбдурахманов, Азим Aзаров, Атай Жумашев, Нуртай Kурмантай, Элдияр Сардарбеков, Темирболот Тапаев, Алимардон Шукуров;
• Чабуулчулар: Эрнист Батырканов, Кадырбек Шаарбеков, Бекжан Сагынбаев;
• Башкы машыктыруучу - Игорь Кудренко.