Бүгүн Өзбекстанда өтүп жаткан Борбордук Азия футбол ассоциациясынын мелдешинде Кыргыз курама командасы Өзбекстан курамасы менен беттешет

Бүгүн, 26-июлда Өзбекстандын Ташкент шаарында Борбордук Азия футбол ассоциациясынын мелдешинде жаштар арасындагы (U-15) футбол боюнча Кыргыз курама командасы Өзбекстан курамасы менен беттешет. Бул тууралуу SUPER.KG порталына Кыргыз Республикасынын футбол федерациясынан билдирди.

Аталган мелдеште 6 өлкөнүн 15 жашка чейинки курама командалары катышып, анда Ооганстан, Иран, Тажикстан, Түркмөнстан, Өзбекстан жана Кыргыз Республикасынын футболчулары күч сынашууда. Мелдеш 22-июлдан 30-июлга чейин Ташкенттин 3 стадионунда өтөт.

Кыргыз курама командасынын башкы машыктыруучусу Нурлан Букуевдин шакирттери алгач Иран курамасынан 0:2 эсебинде утулуп, андан соң Ооганстан курамасынан 2:1 эсебинде жеңилүү ызасын тартып калган.

Эми 3-турдун алкагында Кыргыз курама командасы Өзбекстан курамасы менен кез келет. Аталган беттеш Бишкек убактысы боюнча саат 22:00дө старт алат.

Кыргыз курамасынын беттештеринин тизмеси:

22-июль: Кыргыз Республикасы - Иран - 0:2;
24-июль: Ооганстан - Кыргыз Республикасы - 2:1;
26-июль: Өзбекстан - Кыргыз Республикасы (Бишкек убактысы боюнча саат 22:00);
28-июль: Кыргыз Республикасы - Тажикстан (Бишкек убактысы боюнча саат 19:30);
30-июль: Түркмөнстан - Кыргыз Республикасы (Бишкек убактысы боюнча саат 19:30).

Кыргыз курама командасынын тизмеси:

Дарбазачылар: Курманбек Нурланбеков ("Дордой"), Роман Жаныбек уулу ("Академия");
Коргоочулар: Айтеңир Балбаков, Бейкунт Бейшебай уулу, Артур Данияров ("Илбирс"), Талгатбек Бактыбеков ("Дордой"), Ибрахим Жетимишов ("Академия");
Жарым коргоочулар: Баймырза Алманбет уулу, Арсен Шаршенбеков, Баястан Боконов ("Дордой"), Ырыскелди Тыныбеков, Байбол Эрмеков, Алинур Зарылжанов ("Илбирс"), Алинур Булабаев (Фрунзе);
Чабуулчулар: Ааламбек Абылкасымов ("Абдыш-Ата"), Захриддин Абдилажонов, Кудурет Темирбеков ("Академия"), Атай Иличбек уулу ("Дордой").