Издөөдө жүргөн Данияр Үсөновдун жаңы ысым менен жарыяланган сүрөттөрү интернетте кызуу талкуу жаратууда

Социалдык тармактарда Беларусь маалымат булактарынын бири жарыялаган сүрөттөр кызуу талкуу жаратууда. Тактап айтканда, "Беларусь улуттук биотехнология корпорациясы" ЖАКсынын курулушун баштоо учурунда тартылган сүрөттөн Кыргыз өлкөсүнүн мурдагы премьер-министри, издөөдө жүргөн Данияр Үсөновду көрүүгө болот.

Маалыматта: "Беларусь улуттук биотехнология корпорациясынын" жетекчиси Даниил Урицкий экени жазылган. Бирок компаниянын жетекчисинин өмүр баяны сыр бойдон калууда. Сүрөттү көргөн кыргыздар "Беларуста жеке ишкерлик менен алектенген Даниил Урицкий - Кыргыз өлкөсүнүн мурдагы премьер-министри Данияр Үсөнов" деген билдирүүлөрүн жазышкан. Ал эми иш-чаранын уюштуруучулары компаниянын жетекчиси журналисттерге эч кандай маалымат бербей турганын айткан. Аталган компаниянын кызматкерлери жетекчисин Даниил Тимурович Урицкий деп билерин айтышкан", - деп жазылган.

Эске салсак, 2009-жылы президенттин жарлыгы менен Игорь Чудиновдун ордуна Данияр Үсөнов өкмөт башчы болуп дайындалган. 2010-жылкы Апрель окуясынан кийин Үсөнов өлкөдөн чыгып кеткен боюнча кайрылып келген эмес. 2014-жылы Бишкек гарнизондук соту Данияр Үсөновду сыртынан өмүр бою эркинен ажыратуу чечимин чыгарган.