Дүйнөдөгү эң кымбат хан сарай 411 миллион долларга сатыкка коюлду

Grand Marnier ликёрунун негиздөөчүсүнө таандык дүйнөдөгү эң кымбат хан сарай 411 миллион долларга сатыкка коюлду. Бул тууралуу чет элдик маалымат каражаттары жазып чыгышты.

"Францияда жайгашкан хан сарай 1830-жылы курулуп, 1850-жылы зайтун өстүргөн ишкерге сатылган. Ал эми 1904-жылы Бельгиянын падышасы Леопольддун карамагына өткөн. Үйдө 14 уктоочу бөлмө, банкет залы жана чоң бассейн, жасалма көлмө жана 30 атка ылайыкташкан сарай орун алган. Ошондой эле 15 миңдей өсүмдүк түрү өскөн бак жана тропикалык өсүмдүктөрү бар 20 күнөскана бар. Жыгач менен тосулган китепканада болсо табуу кыйынга турган 3 миңдей китептердин түрлөрү коюлуп, алардын айрымдарынын баасы бир нече жүз миң долларга бааланат", - деп жазылат маалыматта.

188 жылдык тарыхы бар бул хан сарайдын аянты 1672 чарчы метрди түзсө, короосунун аянты 14 гектарга жетет. Хан сарай Франциянын түштүк-чыгыш бөлүгүндөгү Сен-Жан-Кап-Ферра курортунда, деңиз жээгинде жайгашкан.