Орусиялык куудул Евгений Петросян менен жубайы Елена Степаненко ажырашып, актриса мүлктөрүн сот аркылуу бөлүшүүнү суранды

Орусиянын Эл артисти, куудул, алып баруучу Евгений Петросян менен жубайы, актриса Елена Степаненко ажырашып, чогуу тапкан мүлктөрүн сот аркылуу бөлүшүп алат. Бул тууралуу орус басылмалары жазып чыкты.

Белгилүү болгондой, 4-июнда Москванын Хамонов сотуна актриса Елена Степаненко арыз менен кайрылган. Анда актриса Петросян менен чогуу жашаган жылдар аралыгында тапкан мүлкүн бөлүштүрүүнү суранган. Елена Степаненконун арызын кароо 6-августка белгиленген.

Ал эми Евгений Петросян орус маалымат каржаттарынын бирине: "Жубайымдын мүлк талашуусу боюнча эч кандай маалыматым жок. Бул тууралуу уккан дагы эмесмин. Бул кандайдыр бир түшүнбөстүктөрдөн улам келип чыкса керек", - деп билдирген. Ошондой эле куудул аялы менен ажырашкандыгы тууралуу комментарий берүүдөн баш тарткан. Ал: "Комментарийсиз. Менин жашоомдо эмнелер болуп жатканы силерге канчалык кызык?" - деп тим болгон.

Акыркы жылдары эки артисттин ажырашуусу тууралуу маалыматтар жергиликтүү басмылмаларга байма-бай чыккан. Бирок атактуулар жеке жашоосу, ажырашуусу тууралуу үн катпай келген.

Маалымат үчүн: Орусия Эл артисти, куудул Евгений Петросян 1945-жылы 16-сентябрда Азербайжанда төрөлгөн. Алгач театр сахнасында спектаклдерде роль жаратып, монолог окуган. Кийинчерээк куудулдарды камтыган театр түзгөн. Куудул 4 ирет үйлөнгөн. Төртүнчү жубайы Елена Степаненкого 1986-жылы үйлөнгөн.

Елена Степаненко - Орусиянын Эмгек сиңирген артисти, актриса 1953-жылы 8-апрелде Сталинградда төрөлгөн. Чыгармачылык жолун спектаклдерде ойноодон баштаган. Мындан тышкары белгилүү актёр, актрисаларды ийине жеткизе туурап, куудулдук өнөрү менен дагы таанылган. Тасмаларда роль жараткан. Елена Степаненко эки жолу турмушка чыккан.