Футзал боюнча клубдар арасындагы Азия чемпиондугу: Бүгүн Оштун "EREM" командасы австралиялык "Вик Вайперс" менен беттешет

Бүгүн, 6-августта Индонезиянын Жокьякарта шаарында өтүп жаткан футзал боюнча клубдар арасындагы Азия чемпиондугунда Оштун "EREM" командасы австралиялык "Вик Вайперс" менен беттешет.

Аталган мелдеште 16 өлкөнүн чемпиондору катышып, алар 4 тайпага бөлүнүп күч сынашууда. Анда Кыргыздын "EREM" командасы "С" тайпасында жайгашып, таиланддык "Чонбури Блувейв", катардык "Аль Салия" жана австралиялык "Вик Вайперс" командаларына кез келген.

2 турдун жыйынтыгында "EREM" командасы 1 жолу жеңишке жетип, 1 жолу жеңилүү ызасын тартып калган. Алар алгач катардык "Аль Салия" командасы менен беттешип, 4:1 эсеби менен утуп алган. 2-турда оштук команда учурдагы Азия чемпиону "Чонбури Блувейв" менен кездешип, тилекке каршы, 1:5 эсебинде жеңилип калды. Эми 3-турда "EREM" австралиялык "Вик Вайперс" менен беттешип, кийинки этапка өтүүгө аракет кылат.

"Чонбури Блувейв" 2 турдун алкагында 6 упай топтоп кийинки баскычка өтсө, "Вик Вайперс" 2 беттеште жеңилип, кийинки этапка өтүү мүмкүнчүлүгүнөн ажыраган. Эми "С" тайпасындагы акыркы жолдомого "EREM" менен "Аль Салия" күрөшүүдө.

"С" тайпасындагы беттештердин тизмеси:

1-тур, 2-август:

"Чонбури Блувейв" (Таиланд) – "Вик Вайперс" (Австралия) - 9:2;

"Аль Салия" (Катар) – "EREM" (Кыргыз Республикасы) - 1:4.

2-тур, 4-август:

"EREM" (Кыргыз Республикасы) – "Чонбури Блувейв" (Таиланд) - 1:5

"Вик Вайперс" (Австралия) – "Аль Салия" (Катар) - 2:4

3-тур, 6-август:

17:00 "Чонбури Блувейв" (Таиланд) – "Аль Салия" (Катар);

17:00 "EREM" (Кыргыз Республикасы) – "Вик Вайперс" (Австралия).