Сахалинде заводдун кыйраган чатырынын алдында калган эки Кыргыз жаранынын биринин жансыз денеси табылды

Орусиянын Сахалин облусундагы эски заводдун кыйраган чатырынын алдында калган эки Кыргыз жаранын издөө иши уланууда. Жергиликтүү ЖМКлардын Өзгөчө кырдаалдар министрлигинин маалыматына таянып жазганына караганда, биринин жансыз денеси имараттын экинчи кабатынан табылды. Бирок чоң көлөмдөгү бетондордун алдында калгандыктан азырынча чыгарып алууга мүмкүн болбой жатат.

Учурда кырсык болгон жерде куткаруу иштерин жүргүзүү үчүн 80ден ашык куткаруучу жана 20дай техника иштеп жатканы айтылды.

Кырсык 19-август күнү күндүзү болгон. Анда 10 Кыргыз жараны иштеп жаткан эски заводдун чатыры түшүп кетип бир Кыргыз жараны каза болуп, 5 адам жаракат алган. Эки жаран аман калган болсо, дагы эки адамдын абалы белгисиз болуп жаткан. Жаракат алгандар ооруканага жеткирилип, биринин абалы өтө оор экендиги айтылган.

Факты боюнча Орусиянын мыйзамдарына ылайык, кылмыш иши козголуп, окуянын чоо-жайы териштирилип баштаган.