МЕДИА-ПОРТАЛ: Малика Дина: "Ата, сиз айта турган сөздөрдү китептерден окуй албадым"

"Медиа-портал" бөлүмүнө ырчы Малика Динанын "Атаке" аталышындагы чыгармасы жүктөлдү. Бул чыгарма ырчынын атасы Абдумалик Шерматовго арналып жазылган. Малика Дина жаңы чыгармасы тууралуу социалдык тармактагы жеке баракчасына мындай билдирүү жазган.

"Жок, ата! Сиз айта турган сөздөрдү китептерден таба албадым. Сизден күткөн сөздөрдү китептен окуй албадым. Менин жашоомдо бир гана апам болду. Күнү-түнү дебей бөпөлөп карап чоңойтту, коргоду. Апам мен үчүн - апа, ата, ага, эже боло алды. Китептеги сөздөр атанын ордун, атанын коргоосу кандай болорун түшүндүрө алган жок. Мен эч нерсеге муктаж эмесмин, анткени апам менин кыялдарымдын баарын ишке ашырды, ашыгы менен бере алды. Кичинекей кезимде көп нерсени түшүнчү эмесмин. Бирок чоңойгон сайын баарын түшүнө баштадым. Менин жан дүйнөм жылдан жылга жабыркап келет. Ата..., биздин башыбызга кыйын күн түшкөндө эмнеге жаныбызда болгон жоксуз? Эмнеге кызыңызды капалантканда башкалардан коргоп калбадыңыз? Бала бакчанын, мектептин босогосунда көзүмдүн жашын толтуруп алып сизди күткөн, издеген учурда кайда жүрдүңүз? Атасынан айрылуу башка иш. Бирок аман-соо болуп туруп кызынын абалына кызыкдар болбогон өтө оор экен. Ооба, адамдардын катачылыгы болгон, боло берет. Биз андай кыйынчылыктардан, катачылыктардан сабак алабыз. Бирок аялы менен күйөөсү эки айрылыш жолго түшсө балада эмне айып? Эгер качандыр бир кезде сизди капа кылсам кечириңиз.

Баланы таштап басып кетип, ары жакта туруп алып анын тарбиясы тууралуу айтардан мурда ошол тарбияны бергиле. Ошондо гана кара жанын карч уруп баласынын, кызынын бөксөөсүн толтуруу үчүн тытынып иштеген, атасынын ордун жоктотпой, түмөн түйшүк менен баккан энелердин дарегине айтылган пикирлер аз болоттур. Бул билдирүү үй-бүлөсү үчүн бекем чеп боло албаган, өзгөчө балдарына татыктуу тарбия бере албаган мырзаларга арналат. Эгер жубайыңар менен чогуу жашоо мүмкүн болбой, пикириңер келишпей жатса дагы балдарыңарды унутпагылачы. Ар бир үй-бүлөдө чептей бекем турган коргоочу болсун!"

Ал эми ырчынын продюсери Канат Кадыржан чыгарма тууралуу буларга токтолду.

"Ооба, бул ырды Малика Дина атасына белек кылып, жан дили менен аткарды. Ырдын обону жаралганда улам оңдолуп жатты. Ырды студияда жаздырып жатканда Маликанын көзүнөн жаш токтогон жок. Аны көрүп өзүм дагы башкача болуп жаттым. Чыгарманын ар бир сөзүн, маанисин жеке эле Маликанын жашоосуна таңуулап жатканыңыздар туура эмес. Мындай тагдыр учурда көп кездешип жаткандыктан, ырчы замандаштарынын жүрөгүнө муза тартуулагысы келди. Аны менен катар мындай окуялар жашообузда болбосо экендигин айткысы келди. Кыскасы, жакшы чыгармалар көп болушу керек. Баса, жакшы ыр 1-2 күндө жаралбайт", - деди продюсер.

Малика Динанын "Атаке" чыгармасын угуу үчүн шилтеме.