Супер-Инфо
super.kg видео
"Forbes" журналы бул ирет 2018-жылы эң көп киреше актёрлордун тизмесин жарыялады. Анда 57 жаштагы америкалык актёр, режиссёр жана продюсер Жорж Клуни жыл ичинде көп киреше тапкан актёр деп табылды. Маалыматка ылайык, Жорж Клуни 1 жыл ичинде 239 миллион доллар таап, эң кымбат гонорар алган киножылдыз болуп калды. Ал мындай суммадагы каражатты бир гана актёрлук карьерасынан тапкан эмес. Тагыраагы, анын алкоголдук ичимдик чыгарган "Casamigos Tequila" компаниясы кошумча каражат алып келген.
Ал эми кирешелүү делген актёрлордун экинчи сабында "Аска" каймана аты менен белгилүү актёр Дуэйн Жонсон жайгашкан. Ал жыл ичинде 124 миллион доллар тапкан.
Аталган тизмедеги үчүнчү орун 1 жылда 81 миллион доллар тапкан америкалык актёр Роберт Дауни-кичүүгө буюрган. Ал бул кирешенин көбүн "Өч алгычтар: Түбөлүктүү согуш" тасмасындагы ролу аркылуу тапкан.
Дүйнөдөгү таасирдүү, кирешелүү адамдардын байлыгын эсептеген "Forbes" журналы буга чейин эң көп киреше тапкан актрисалардын тизмесин жарыялаган.
