Рахман Разыков: "Куудулдар да кыргыз тилинен сынак тапшырып, өткөнүбүз куудул, өтпөгөнүбүз мэр болобуз"

Куудулдар да кыргыз тилинен сынак тапшырып, сынактан өткөндөр куудул, кулап калгандар мэр болот. Мындай тамашалуу пикирин сатирик Рахман Разыков ырчы, куудул Борончу Кудайбергенов менен биргеликте өткөргөн маалымат жыйында билдирди.

"Биз токтоп калган "Ар бир айдын алтысы" аттуу долбоорубузду кайрадан баштаганы жатабыз. Долбоор бир топ саясатчылардын ачык да, тымызын да бизге көрсөткөн кысымдарынан улам токтоп калган. Анткени биз концертибизде тамаша аркылуу коррупционерлерди элге уяткарчубуз. Эл ай ичинде болгон саясаттагы өзгөрүүлөрдү, жаңылыктарды биздин концерттен угуп калышкан.

Азыр президент баш болуп коррупция менен күрөшүп жаткан учурда долбоорду улантуу мезгили келди деп ойлойбуз. Жаңы концертте деле мурдагыдай 60-70 пайыз саясий сатираларды алып чыгабыз. Мисалы, куудулдардан кыргыз тилинен сынак алабыз. Сынактан өткөнү куудулдукка кабыл алынат, өтпөй калгандары мэр болушат", - деди Рахман Разыков.

Ал эми Борончу Кудайбергенов төмөндөгүлөрдү кошумчалады: "Бул долбоор убагында бир топ саясатчылардын сынына кабылган. Мээрбек Мискенбаев жана башка саясатчылар бизди "террористтер" деп атап, "өлкөнү түндүк-түштүккө бөлүп, чагымчылдык кылып жатышат" дегенге чейин барышкан. Азыр жаңы бийлик келип, андан бери бир топ өзгөрүүлөр болду. Андыктан мурункудай куугунтук, кысымдар болбойт деп үмүттөнөбүз".