Ошто көп кабаттуу жатаканадан 7 айлык ымыркайы менен кошо боюн таштаган келиндин баласынын абалы оор. Анын баш мээсине операция жасалат

Ошто көп кабаттуу жатаканадан 7 айлык ымыркайы менен кошо боюн таштаган келиндин баласынын абалы оор бойдон калууда. Бул тууралуу бүгүн, 11-сентябрда SUPER.KG'ге Ош облустук балдар ооруканасынан билдиришти.

Маалыматка ылайык, учурда баланын абалы оор. Ымыркайдын баш мээси чайкалып, башынан катуу жаракат алган. Дарыгерлердин консилиуму болуп баланын баш мээсине операция жасоо чечими кабыл алынды.

Белгилүү болгондой, учурда боюн таштаган келиндин абалы орто, анын жамбаш сөөгү сынып, баш мээси чайкалган. Аял боюн таштаган учурда мас болгону аныкталды.

Эске салсак, окуя 6-сентябрда саат 17:00 чамаларында Ош шаарындагы Черёмушки кичи районунда жайгашкан төрт кабаттуу жатаканада орун алган. Айрым маалыматтарда ымыркайы менен өз боюн таштаган келин жолдошу менен ажырашып, Ошто эжесинин үйүндө жашап жүргөн.