"Супер сулуу-2009" сынагынын жеңүүчүсү Жамиля Ишенбаева сүйүктүүсүн ачыкка чыгарды

"Супер сулуу-2009" сынагынын жеңүүчүсү, модель Жамиля Ишенбаева сүйүктүүсүн ачыкка чыгарды. Көп мырзалардын жүрөгүнө чок салган сулуу интернеттеги жеке баракчасына сүйүктүүсү менен түшкөн сүрөтүн жүктөп "Менин коргоочум, менин таянар тоом" деп жазып, "жүрөкчө" белгисин койгон.

Жамилянын сүйүктүүсү менен бирге түшкөн сүрөтүнө суктангандар аларга бакыт каалашты. Сүрөттүн алдына "Сиз жигитиңиздин жүзүн жашырбай калдыңызбы?", "Экөөңүздөр жарашыктуу түгөй экенсиздер", "Жигити экөө окшош экен" деген сыяктуу комментарийлер жазылды.

Ал эми сүйүктүүсү тууралуу бийкеч төмөнкүлөрдү билдирди: "Экөөбүз кыз-жигит болуп сүйлөшүп жүргөнүбүзгө бир топ убакыт болуп калды. Ал мамлекеттик кызматта иштейт, шоу-бизнес дүйнөсүнөн такыр эле алыс адам. Жадакалса социалдык тармактарда да отурбайт. Экөөбүздүн жашыбыз тең".

Ишенбаева "Супер-Инфо" гезити уюштурган сулуулар сынагында "Супер сулуу-2009" деп табылып, 7 кереметтин бири – Мисирде эс алып келген. Андан сырткары "Азиянын супер модели. Кыргызстан-2011", "Дүйнөлүк туризм сулуусу-2011", "КУУнун сулуусу-2013" сыяктуу бир нече сынактын жеңүүчүсү болууга жетишкен. Ошондой эле Жамиля Ишенбаева жарнамалык ролик, клиптерге да тартылып келет.