"Супара" этнокомплексинде өрт чыкты

Бүгүн 17-сентябрдан 18-сентябрга караган түнү өлкөбүздөгү "Супара" эс алуу этнокомплексинен өрт чыкты. Бул тууралуу SUPER.KG порталына футболчу Азамат Байматов билдирди.

"Мен бүгүн эч кимге айтпай эле Индонезиядан учуп келгем. "Супара" этнокомплекси жайгашкан жактагы мейманканага бармакмын. Жолдо келе жатсам аталган эс алуучу жай өрттөнүп жатыптыр. Башында аз эле жер өрттөнгөндөй көрүнгөн. Кийин шамалдан улам өрт ал жактагы чоң боз үйгө чейин жетти. Дал ошол убакытта өрт өчүрүүчү унаа келди. Андан соң газ жарылды окшойт, айтор катуу үн чыгып, асманга оттун майда жалындары учту" деди ал.

Ошондой эле аталган эс алуучу жайда иштеген кызматкерлер өрт чыкканын тастыкташты.

Азырынча өрттүн келип чыгуу себеби боюнча Өзгөчө кырдаалдар министрлиги билдирүү тарата элек.