Бишкекте бала бакчада иштеген эркек кызматкер 5 жаштагы кызга карата сексуалдык мүнөздөгү иш-аракеттерди жасаган деп шектелүүдө

Бишкекте менчик бала бакчада 5 жаштагы кызга карата сексуалдык мүнөздөгү ыплас иш-аракеттерди жасаган деп бакчанын кызматкери кармалды. Бул тууралуу SUPER.KG порталына Бишкек ШИИББинин басма сөз кызматы билдирди.

Маалыматка ылайык, окуя 26-сентябрда катталган.

"Окуя Октябрь районунда катталган. Анда 5 жаштагы кызга бала бакчада иштеген 32 жаштагы эркек кызматкер сексуалдык мүнөздөгү ыплас иш-аракеттерди жасагандыгы жазылган. Бул факт боюнча кылмыш иши козголуп, шектүү Бишкек ШИИББинин убактылуу кармоочу жайына киргизилди", - деди басма сөз кызматы.

Айрым маалыматтар боюнча, ал бала бакчадагы ийримдерде үйрөтүүчү болуп иштеген.

Кыргыз өлкөсүндө жалпы бала бакчалардын саны 1062, анын 705и Бишкек шаарында жайгашкан. Ал эми бала бакчада тарбияланган кыздар-балдардын саны 152 миң 216. Бала бакчалардын 334ү мамлекеттик болсо, 648и муниципалдык. Ал эми калган 80и менчик бала бакча.