Жанар Акаев: "Демилге" кыймылына кызматка барбай деле Кыргыз мамлекетине жардам берсем дегендер чогулууда"

Жогорку Кеңештин депутаты Жанар Акаев “Демилге” деген кыймыл түзүп, бир топ активдүү жаштарды бириктирип, ар тараптуу иш-чараларды өткөрүп баштады. Кыймылдын максаты тууралуу эл өкүлүнөн сурадык.

- Жакында Москвада мигранттар үчүн ири иш-чара өткөрдүңүздөр. Анын максаты кандай болду? Шайлоого даярдык дегендей кабыл алгандар да болду окшойт?

- Cоңку учурда Орусиядагы мекендештер тууралуу негативдүү маалыматтар көп таркады, мушташты, сүзүп кетти, бычактады деген жаңылыктар көп болду. Ошол эле учурда интернетте сырттагы мекендештерди тынч жүрсөңөр боло деп тилдегендер көбөйдү. Бир окуядан улам эле жалпы Орусиядагы мекендештер тууралуу сөз кылып, аларды тилдеген туура эмес. Миллиондогон жарандарыбыз дал ошол сыртта иштеп, алар жиберген каражат Кыргыз мамлекетинин экономикасынын өзөгүн түзүп жатат. Жүз миңдеген үй-бүлөнү багып жатышат. Ошон үчүн алардан биз тынбай кабар алып, жок дегенде жылуу сөзүбүздү айтып, алардын жакшы жагын дагы даңазалап турушубуз керек. Мамлекеттик тил күнүнө биз Москвада футболдук турнир уюштурдук, ага 60 команда катышты. Андан сырткары маданий иш-чара болду, эл-жерин сагынган мекендештер үчүн тил, улут тууралуу поэзия ырлары жаңырды. Мунун баары керек нерсе, бизге, уюштуруучуларга абдан көп киши келип алкыш айтышты. Шайлоого эч кандай тиешеси жок, азыр шайлоо болгуча көп убакыт бар, мен мурда барганда Москвадагы кыргыз жаштарына сөз бергем, ошол убадабызды аткардык. Биз муну жыл сайын уюштуруп турууну максат кылып жатабыз.

- “Демилге” кыймылынын максаттары кандай? Ал кыймылда кимдер бар?

- Азырынча саясий максат жок. Мен болгону өкмөткө дайыма парламенттен сунуш, сын айтып турам. Көп маселеге көңүл бурулбай калат. Ошондуктан өзүмдүн жакын санаалаш досторума "бир кыймылга чогулалы да Кыргыз мамлекетине пайдалуу иштерди өз алдыбызча өкмөттү күтпөй эле жасай берели" деп айтсам, алар колдоого алышты. Жаштарга арналган иштерди көп жасасак деген ой бар. Азырынча Бишкек шаардык кеңешинен айрым депутаттар кошулду, башка да активист жаштарды чогултуп жатабыз. Ошол эле Москвадагы иш-чара “Демилгени” колдогусу келген Орусиядагы жаштардын өздөрүнүн колдоосунда өттү. Эми жакында жаштардын республикалык деңгээлдеги дагы чоң иш-чарасын өткөрөбүз. Ошондой эле “Демилге” кыймылы менен Ооганстандан көчүп келген кыргыздарды турак-жай менен камсыздоо маселесин да колго алууну пландап турабыз. Мунун баары элдин колдоосу менен болот. Биз болгону демилге көтөрүп, андан натыйжа көрсөтөбүз.