Айчүрөк Иманалиева концертинде үй-бүлөсүн эл алдына алып чыкты (фото)

Бүгүн, 22-октябрда Кыргыз Республикасынын Эмгек сиңирген артисти Айчүрөк Иманалиева "Сахнада 30 жыл" аттуу юбилейлик концертин тартуулады. Ырчынын чыгармачылыгын сыйлап келген көрүүчүлөр Т.Сатылганов атындагы улуттук филармониянын 90 пайызын түздү.

Иманалиева эл алдына белгилүү "Роза гүлү" аттуу ырын аткарып көрүүчүлөр менен амандашкан соң, репертуарындагы ырларын катары менен аткарды. Кечеде алып баруучулукту ырчынын концертин 30 жылдан бери алып барып келген Турусбек Жумалиев аркалады.

Концерттин жүрүшүндө Жогорку Кеңештин депутаттары Бактыбек Райымкулов, Махабат Мавлянова Иманалиеваны 30 жылдык мааракеси менен куттукташып, "Сахна жылдызы" медалы менен сыйлашты. Андан соң ырчы жолдошу Таалай Ороскулов, уулу Аргенди жана кызы Аэлитаны эл алдына алып чыгып тааныштырды.

Айчүрөк Иманалиева улуу уулу Аргенди "азыр кайда?" деп сурагандар көп экенин айтып, сахнада күйөрмандарын Арген менен кайрадан тааныштырды. Арген апасына букет тартуулады.

Айчүрөк Иманалиеванын юбилейлик концерти менен куттуктап ырчылар Адилет Азимов, Ислам Акматов, шакирти Милана Сариева келишип, ыр белектерин тартуулашты.

Концерттин видеосюжетин эртең, 23-октябрда SUPER TV'дан көрө аласыздар.