Ырчы Айпери Кубик кызы "Ош" эл аралык аэропортуна нааразычылыгын айтып чыкты. Аэропорттун жообу

Ырчы Айпери Кубик кызы "Ош" эл аралык аэропортунун ишмердүүлүгүнө нааразычылыгын айтып, айрым кызматкерлер жоопко тартылсын деди. Бул окуя тууралуу SUPER.KG порталы ырчыга байланышып, төмөндөгүдөй жооп алды.

"Мени Орусиянын Саратов шаарында жашаган мекендештер 21-октябрда тойго чакырган. 20-октябрда Сүлүктү шаарында тойдо болгондуктан Ош-Москва-Саратов рейсине билет алып койгом. Тойдон чыгып аэропортко барып жүгүмдү тапшырып жатып "жүгүм калып калбасын, тойго барганда уят болбоюн" дегем. Саратовго жеткенде жүгүмдү таппай койдум. Мени менен чогуу келгендердин жүктөрү келди. Бир эле меники жок. Анан Москва менен Саратовдун аэропортторуна арыз менен кайрылсам, кечирим сурап: "Бизден кетсе чыгымыңарды төлөп бермекпиз. Бирок жүгүңүз келген жок" дешти. Дароо эле атама (ред.: Кубик Калыков) чалып, иштин чоо-жайын айттым. Ал сураштырса, жүгүм Оштогу аэропортто калып калыптыр. Аэропорттун кызматкерлерине чалып "эмнеге жүгүм калып калды" десем, катасын моюнуна алып, кечирим сурагандын ордуна жүктөгөндөргө шылтап коюшту. Өзүбүздүн кызматкерлер ушинтип жатышканы жанымды кейитти.

Ал эми тойго барбай калган жокмун, бардым, бирок той ээлеринин алдында уят болуп, сөзгө калдым. Менин чыгымдарымды аэропорт өз колуна алышы керек", - дейт ырчы.

Ал эми аталган окуя боюнча "Манас" эл аралык аэропортуна кайрылганыбызда, басма сөз кызматы кызматтык иликтөө жүрүп жатканын билдирди.

"Учурда окуя боюнча кызматтык иликтөө иши башталды. Эмнеге бир жүргүнчүнүн жүгү калып калганын, ага ким жооптуу экени аныкталса, жоопко тартылат. Иликтөө иши аягына чыкса, толук маалымат берилет", - дейт маалымат кызматынан.