Самара Каримова: "Менин кичинекей кызматка келишим көп адамдын уйкусун бузат экен"

"Менин кичинекей кызматка келишим, көп адамдын уйкусун бузат экен". Ырчы Самара Каримова мындай пикирин 1-ноябрда Ош шаарындагы мамлекеттик музыкалык окуу жайынын жетекчилигинен бошотулгандан кийин социалдык түйүндөгү баракчасына жазды. Ырчы ал билдирүүсүндө аталган окуу жайды эки жыл аралыгында оңдоп коё турган ою болгонун да белгилеген.

"Менде баары жакшы. Жараткан мага дагы бир сыноо бериптир. Чын жүрөгүмдөн кабыл алдым. Өнөр адамы катары музыкалык окуу жайдын абалына жүрөгүм ооручу. Зериккенимден же кыларга ишим жоктон барган жокмун. Тобокелге салып, демөөрчү тартып, долбоор жазып 2 жылда гүлдөтүп коймокмун. Ойчулдун ою бүткүчө, тобокелчинин иши бүтчү эле. Мейли, насип деген нерсе бар. Менден башка жакшы адам келип оңдоор, үмүт кылам жана тилектешмин. Өнөр адамдары абдан назик. Сулуу, кооз, көркөм жерде жашаса, окуса өнөр өөрчүбөйбү.

Өзүмдүн кадырымды дагы бир жолу сездим. Мен деген оңой адам эмес экенмин. Менин кичинекей кызматка келишим көп адамдын уйкусун бузат экен. Кээ бир чоң кызматта иштеген агаларымдын көкөйү кайнайт экен. Бирок айтарым, кучактап отурган креслодон кетериңер менен эл унутат. Кудайым берген талантым менен элдин жүрөгүндө болсом керек. Мага жата калып бут тоскондор, мен силерге капа эмесмин.

Көп сөз бар эле, бирок менин мүнөзүм аял болсом да эркекче. Бир айтам, бирок кайтпаймын", - деген пикирин жазган ырчы айым.

Самара Каримованы Ош шаарындагы Ниязалы Борошев атындагы Ош мамлекеттик музыкалык окуу жайына жетекчи кылып дайындоо боюнча буйрук 24-октябрда чыгып, ал эмгек жамааты менен расмий түрдө тааныштырылган болчу. Бирок бүгүн маданият маалымат жана туризм министри Азамат Жамангулов ал буйрук жокко чыгарылганын билдирди.