Шоумен Бакыт Байсариевдин биринчи жубайы жана ырчы Фарида Карбозова ак өргөөлүү болушту. Бул күздө дагы кайсы белгилүүлөр жаңы конуштуу болду?

Кыргыз шоу дүйнөсү окурмандарды өзүнүн жагымдуу кабарлары менен кубантып келет. Быйылкы күздө бир нече белгилүүлөр өздөрүнүн түгөйүн тапса, айрымдары наристе жытын жыттап отурат. Ал эми айрымдары ак өргөөлүү болушуп, үйүнө кут чакырып турган убагы. SUPER.KG порталы быйылкы күздө жаңы конушка кирген белгилүүлөрдү тизмектеп көрдү.

Ырчы Фарида Карбозова борбордогу көп кабаттуу үйлөрдүн биринен батир алды. Чыгармачылыктан тапкан каражатымды топтоп, өз мээнетим менен алдым деген ырчы буларды айтып берди.

"Талыкпай иштеп жүрүп, каражатымды топтоп жүргөм. Үй алууга жетиштүү каражат топтогондон кийин борбор калаадагы көп кабаттуу үйлөрдүн биринен 2 бөлмөлүү даяр батир алдым", - дейт ал.

Ак өргөөлүү болгондордун катарында шоумен Бакыт Байсариевдин биринчи жубайы, бийчи Наргиза Момунтаева дагы бар. Бийчи үйдү бир жыл мурда алганын айтып, мындай дейт.

"Борбордогу көп кабаттуу үйлөрдүн биринен 2 бөлмөлүү батирди бир жыл мурда алгам. Бирок ичин өзүбүз жасалгалай турган болгондуктан быйыл бүтүрдүм. Негизи ишим көп болгондуктан батирдин жасалгасын апам колго алган. Телефон аркылуу акылдашып, кандай эмерек, кандай дубал кагаз керек экенин чечип жаттык. Үйдүн жасалгасы бүтүп, биринчи эле ата-энем, бир туугандарымды, курбуларымды жаңы конушума чакырдым. Эми кесиптештеримди чакырам. Үй алууга жумушум жана ата-энем жардам берди".

"Кыз-Бурак" тобунун мурунку солисти, ырчы Айжамал Кабылова дагы Ош шаарындагы көп кабаттуу үйлөрдөн батир алган. Ал: "Балдарым Ош шаарында окуйт. Анын үстүнө ата-энеме дагы жакын. Буюрса, ак өргөөбүзгө кирип жашаганга саналуу эле күндөр калды", - деп билдирген.

Ал эми алып баруучу Нурсултан Майназаров дагы күркүрөгөн күздө жаңы конушка кирген. Ал жаңы конушуна жакын досторун чакырып, кече өткөргөн.

Ак өргөөлүү болгондордун катарын ырчы, алып баруучу, актриса Анжелика толуктаган. Ал жаңы курулуп бүткөн көп кабаттуу үйлөрдөн батир алган. Учурда ырчы үйүнүн жасалгасы менен алектенип жүргөн чагы.