ТЕСТ: Чоңдордун байлыгы, мал-мүлкү, акчасы... Алардын соңку тапшырган декларациясы менен тааныштыңызбы?

Жогорку Соттун төрайымы Гүлбара Калиева 2017-жылы 1 миллион 153 миң 378 сомдук киреше тапкан. Ал декларациясында чыгашасы жана башка мүлктөрү тууралуу маалымат берген эмес. Калиеванын жакын туугандары болсо 2017-жылы 704 миң сомдук киреше тапкан. Башка мүлктөрү тууралуу маалымат жок. Гүлбара Калиева 2017-жылы Жогорку Соттун судьясы болуп иштеп келген.

Коопсуздук кеңешинин катчысы Дамир Сагынбаев 2017-жылы 3 миллион 520 миң 699 сомдук киреше тапкан. Ошол эле учурда 1 миллион 600 миң сом короткон. Ал декларациясына унаасы бар экенин көрсөткөн, бирок үлгүсү, чыккан жылы жөнүндө маалымат берген эмес. Андан сырткары ал 520 миң сомдук кыймылдуу мүлккө ээ экенин белгилеген.

Учурдагы баш прокурор Өткүрбек Жамшитов 2017-жылы 806 миң 700 сомдук киреше тапкан. Ал 600 чарчы метрлик жер тилкесине, 150 миң сомдук эмерекке ээлик кылат. Ошондой эле 300 миң сомго бааланган бодо малы, 250 миң сомго бааланган майда жандыгы бар экени декларациясында көрсөтүлгөн. Жамшитов 2017-жылы Жалал-Абад облусунун прокурору болуп иштеген.

Жогорку Кеңештин депутаты Камчыбек Жолдошбаев 2017-жылы 863 миң 615 сомдук киреше тапкан. Ал 39,81 чарчы метрлик батирге ээ. Андан сырткары "Беш-Сары" мекемесин толук түрдө башка жаранга өткөрүп бергенин көрсөткөн. Ал эми автоунаасы тууралуу маалымат жазылган эмес. Жолдошбаевдин жакын туугандары болсо 2017-жылы 120 миң сом киреше тапкан.

Жогорку Кеңештин депутаты Искендер Матраимов 2017-жылы 746 миң 994 сом киреше тапкан. Андан сырткары 290 миң сомдук эмерекке, 150 миң сомдук турмуш-тиричилик техникасына жана 140 миң сомдук түрдүү материалдык байлыкка ээ экенин көрсөткөн. Эл өкүлүнүн жакын туугандары болсо 2017-жылы 2 миллион 155 миң 32 сомдук киреше тапкан. Алар 1385,9 чарчы метрлик кыймылсыз мүлккө ээ.

Жогорку Кеңештин депутаты Алиярбек Абжалиев 2017-жылы 674 миң 284 сом пайда тапкан. Андан сырткары ал Тойота үлгүсүндөгү автоунаага ээлик кылат, бирок анын чыккан жылын көрсөткөн эмес. Андан сырткары 2 миллион 970 миң сомго бааланган жылкы, ири мүйүздүү мал жана майда жандыктарга ээлик кылат. Абжалиевдин маалыматында жакын туугандарынын байлыгы жана кирешеси көрсөтүлгөн эмес.

Жогорку Кеңештин депутаты Иса Өмүркулов былтыр 4 миллион 476 миң 691 сом киреше тапкан. Чыгашасы болсо 5 миллион 137 миң 500 сомду чапчыган. Андан сырткары 24,61 чарчы метрге барабар болгон 9 айыл чарба багытындагы жер тилкесине ээ. Ошондой эле 1560 чарчы метр болгон кыймылсыз мүлкү бар. Өмүркулов 21 миллион 112 миң 500 сомго бааланган жылкы, ири мүйүздүү мал жана майда жандыктарга ээ экенин декларациясында көрсөткөн.

Депутат Акылбек Жапаров 2017-жылы 892 миң 234 сом тапкан. Ошондой эле 77,5 чарчы метрлик батирге ээ. Анын жакын туугандары 55 миллион 895 миң 647 сомдук киреше тапкан. Ошондой эле 2 миң 330 чарчы метрлик 5 контейнери бар. Мерседес-Бенц 210, Мерседес-Бенц 410, Мерседес-Бенц 409, Мерседес-Бенц 208, Мерседес-Бенц 811, Мерседес-Бенц 710, Мерседес-Бенц 308, Мерседес-Бенц 310 үлгүсүндөгү автоунааларга ээ.

Президенттик аппараттын мурдагы башчысы Фарид Ниязов 2017-жылы 521 миң 35 сомдук киреше таап, 450 миң сомун сарптаган. Анын 45,2 чарчы метрлик батири бар. Ошондой эле 1346,4 чарчы метрлик 5 жер тилкесине ээлик кылат. 2 жер тилкесин башка адамдын башкаруусуна тапшырган. Ниязовдун декларациясында 1984-жылы чыккан Ауди 80 үлгүсүндөгү автоунаага, 2007-жылы чыккан ЛТЗ-60 үлгүсүндөгү тракторго ээлик кылары көрсөтүлгөн. Дагы бир тракторду башка адамга өткөрүп берген.

Мурдагы баш прокурор Индира Жолдубаева 2017-жылы 852 миң 186 сомдук киреше тапкан. Ал декларациясында 28,8 чарчы метрлик турак-жайга, 34 чарчы метрлик батирге жана 350 миң сомдук баалуу буюмдарга ээ экенин көрсөткөн. Индира Жолдубаеванын жакын туугандарынын кирешеси, мүлкү тууралуу маалымат берилген эмес.

Экс-президент Алмазбек Атамбаев 2017-жылы 100 миллион 118 миң сом киреше тапкан деп анын Салык кызматына тапшырган декларациясында көрсөтүлгөн. Ал эми анын чыгашасынын эсеби 77 миллион сомду түзгөн. Экс-президент аянты 6,4 гектар айыл чарба багытындагы жер тилкесине, 2,7 гектар жер тилкесине курулуп жаткан 116 чарчы метр имаратка ээ. Атамбаевдин бардык кыймылсыз жана кыймылдуу мүлкү уулу Сейитбек Атамбаевге катталган. Экс-президенттин жакындары 2017-жылы 738 миң 331 сом киреше тапкан.

Мурдагы премьер-министр Сапар Исаков 2017-жылы 996 миң 671 сомдук киреше тапканы декларациясында көрсөтүлгөн. Ал эми чыгашасы жазылган эмес. Исаков 127,4 чарчы метрлик батирге жана 20,2 чарчы метрлик гаражга ээ. Исаковдун декларациясында башка мүлктөрү тууралуу маалымат берилген эмес. Исаковдун жакын туугандары болсо 2017-жылы 140 миң 986 сомдук киреше тапкан. Алар 370,2 чарчы метрлик турак-жайга жана Лексус RX450H үлгүсүндөгү автоунаага ээ экени көрсөтүлгөн.

Учурдагы премьер-министр Мухаммедкалый Абылгазиев 2017-жылы президент менен Жогорку Кеңештин төрагасынан да көп киреше тапкан. Анын декларациясына ылайык, 2017-жылдагы кирешеси 2 миллион 367 миң 986 сомго барабар. Президент Сооронбай Жээнбеков өз декларациясында былтыр 890 миң 994 сомдук киреше тапканын көрсөткөн. Жогорку Кеңештин төрагасы Дастанбек Жумабеков 2017-жылы 769 миң 781 сом киреше тапкан.

Жогорку Кеңештин экс-депутаты, учурда абакта жаза мөөнөтүн өтөп жаткан Өмүрбек Текебаев 2017-жылы 138 миң 676 сомдук киреше тапкан. Ал эми учурда чет өлкөдө жүргөн экс-депутат Өмүрбек Бабанов былтыр 1 миллион 330 миң 829 сомдук киреше тапкан деп декларацияда көрсөтүлгөн. Ошентип Бабановдун кирешеси Текебаевдикине салыштырмалуу 1 миллион 192 миң 153 сомго көбүрөөк.