"Вечерний Бишкек" басылмасынын ээси камакка алынды

Кечээ, 21-ноябрда "Вечерний Бишкек" басылмасынын акцияларынын контролдук пакетинин жана жарнамалык "Рубикон" фирмасынын ээси Александр Рябушкин камакка алынды. Бул тууралуу Ички иштер министрлигинен билдиришти.

Маалыматка ылайык, "Вечерний Бишкек" басылмасынын акционерлери тарабынан түшкөн арыздардын негизинде текшерүү иштери жүргүзүлгөн. Анда Свердлов райондук сотунун (2016-жылдын 5-февралынан тарта) жана апелляциялык арызды караган Бишкек шаардык сотунун чечими менен (2016-жылдын 15-июлунан тарта) "Вечерний Бишкек" басылмасы, "Вечерний Бишкек" гезитинин редакциясы, басылманын интернет сайты, "Жаңы Агым" жана "МСН" гезиттери ошондой эле "Рубикон" жарнамалык фирмадан Эркин Мамбеталиевдин пайдасына 1 миллион сомду өндүрүп берүү өкүмү чыккан. Ошондой эле Свердлов райондук сотунун чечими менен 2015-жылдын 28-августунан тарта "Вечерний Бишкек" басылмасынан Икрамжан Илмияновдун пайдасына 1 миллион сом өндүрүп берүү өкүмү чыккан.

2016-жылдын 21-октябрында Мурат Божокоев менен Рябушкин алдын ала сүйлөшүп алып, бөлүштүрүү жана башкаруу ыйгарым укуктарын пайдалануу менен “Вечерний Бишкек” компаниясынын акционерлеринин кызыкчылыктарын эске албай туруп, арыз ээси Э.Мамбеталиев менен “Вечерний Бишкектин” гана каражатынан 1 миллион сомду төлөө боюнча макулдашууга кол коюшкан, бирок бул акча каражат "Вечерний Бишкек" басылмасынан, "Вечерний Бишкек" гезитинин редакциясынан, басылманын интернет сайтынан өндүрүлгөн. Ошол эле күнү "Вечерний Бишкек" басылмасынын кассасынан Мамбеталиевге 1 миллион сом акча берилген. Мындай иш-аракеттер менен басылманын директору жана басылманын башкармалыгынын башчысы тарабынан жабык акционердик коомго материалдык зыян келтирилген.

Аныкталган фактыларга ылайык, ИИМдин тергөө кызматы тарабынан 2018-жылдын 2-ноябрында Кылмыш-жаза кодексинин 173-берененин 2-бөлүгү, 221-берененин 1-бөлүгү, 350-берененин 1-бөлүгү менен кылмыш иштери козголгон. 21-ноябрда А.Рябушкин Кылмыш-жаза кодексинин 94-беренесинин негизинде Бишкек ШИИББинин убактылуу кармоочу жайына камакка алынды. Учурда бул факт боюнча тергөө амалдары жүрүүдө.