"Супер-Инфо" 2018-жылдын мыкты гезити деп тандалды

Бүгүн, 23-ноябрда Токтогул Сатылганов атындагы улуттук филармонияда "Жылдын тандоосу" фестивалы болуп өттү. Фестивалдын жүрүшүндө Кыргыз өлкөсүндөгү мыкты делген товарлар жана кызматтар керектөөчүлөр жана эксперттер тарабынан тандалды.

"2018-жылдын мыкты гезити" номинациясы Кыргыз өлкөсүндөгү эң көп нускалуу "Супер-Инфо" гезитине ыйгарылды. Гезит ээси "Компьютер Пресс" жоопкерчилиги чектелген коомунун президенти Шайиста Шатманова мындай ийгиликтин сыры эмгекте жана ынтымакта экенин белгиледи.

"Бул сыйлыкты алып жатканыбызга абдан кубанып турабыз. Мындай ийгиликтердин артында талыкпаган эмгек жана жамаатыбыздын биримдиги турат. Уюштуруучуларга, биздин эмгегибизди баалагандардын баарына терең ыраазычылык билдиребиз. Бүгүнкү бизден башка сыйлык алган жамааттардын баарын куттуктайбыз", - деди Шайиста Шатманова.

Ал эми "Супер-Инфонун" башкы редактору Мирлан Өмүралиев талыкпаган эмгектин бааланышы сыймык экенин билдирди.

"Сыйлык алуу сыймык. Уюштуруучуларга рахмат айтабыз. Мындай ийгиликтин келишине окурмандарыбыздын да салымы чоң. Андыктан ар дайым биз менен бирге болуңуздар демекчибиз", - деди Мирлан Өмүралиев.

Эл аралык "Жылдын тандоосу" фестивалы Кыргыз өлкөсүндөгү белгилүү жана сапаттуу товарларды жана кызматтарды жайылтуу үчүн жыл сайын өткөрүлөт. Долбоордун башкы максаты - белгилүү бир товардын же кызматтын сапатын жана популярдуулугун бирдиктүү баалоо болуп саналат. Баалоо керектөөчүлөр жана дасыккан эксперттер тарабынан жүргүзүлүп, ар бир номинация боюнча лидерлер тандалат.

"Жылдын тандоосу" фестивалы эл аралык макамга ээ жана ар жыл сайын Украина, Беларусь, Казакстан, Өзбекстан жана Кыргыз өлкөсүндө өткөрүлөт.