Өзбек актёру Улугбек Кадыров: "Делбирим" тасмасын көрө элекмин. Биринчи жолу Бишкектен көрөм"

Өзбек актёру Улугбек Кадыров "Делбирим" тасмасын биринчи жолу эртең Бишкектен көрөт. Актёр мындай билдирүүнү бүгүн, 4-декабрда өткөн пресс жыйында айтты.

"Чыңгыз Айтматовдун 90 жылдыгына карата тартылган тасмада Байтемирдин ролун аткарып жатканыма кубанычтамын. Мен өзбек элинин атынан сиздерди да куттуктайм. "Делбирим" тасмасынын Ташкент шаарында болгон бет ачарына ден соолугума байланыштуу бара албай калгам. Эми тасманы Бишкек шаарынан көрөм", - деди ал.

Ошондой эле "сизге дагы кыргыз киносуна тартылуу боюнча сунуштар түшүп жатабы?" деген суроого актёр жооп берди.

"Жок, азырынча сунуштар боло элек. Себеби "Делбирим" тасмасы Кыргыз жергесинде эртең көрсөтүлөт.

Мен жазуучу Чыңгыз Айтматовдун чыгармаларын институтта окуп жүргөндө агайымдын сунушу менен окуп калдым. Мага "Жамийла" повести абдан жаккан. Аны ушунчалык эргүү менен окугандыктан жыл бою ошол повест тууралуу ойлонуп, бир башкача дүйнөдө жүргөм. Ошондой эле "Кызыл жоолук жалжалым" повестин да окуп, өзүм ушул чыгармада роль жаратып каларымды билген эмесмин", - деди Улугбек Кадыров.