ЭЛДИК КАБАР: "Бала-бакчага электрондук кезекке туруу үчүн арыз толтурсак "базага түшпөптүр, билген жериңе бар" деп коюшту" дейт окурман

Бала-бакчага электрондук кезекке турууда маселе жаралганда тийиштүү мекемеге кайрылсак, "билген жакка кайрылып, маселеңерди чечип алгыла" деп жооп берди.

Мындай маалыматты "ЭЛДИК КАБАР" рубрикасына Бишкек шаарынын тургуну жиберген.

Анын айтымында, кезекке туруу үчүн атайын ачылган интернет баракчадан толтурган арызы тиешелүү кызматтын базасына келип түшкөн эмес.

"Интернет баракчадан электрондук кезекке туруу үчүн арыз толтурганбыз. Качан кезек келерин билүү үчүн Ленин районуна караштуу сурап-билүү телефонуна чалсак, чалууга жооп берген Элиза аттуу кызматкер орой жооп берип, биздин арыз компьютерге келип түшпөгөнүн айтты. Себебин сурасак, "сиздин арызыңыз "спам" же "корзинкага" келип түшкөн болушу мүмкүн" деп жооп берди. Эмне себептен андай болгонун так түшүндүрүп берген жок. "Билген тарабыңарга кайрылып маселеңерди чечип алгыла" деп телефонду коюп койду. Арыздын келип түшпөгөн себебин жакшылап түшүндүрсө, тиешелүү жактарга кайрылып, ката кеткен болсо оңдобойт белек?

Бул кандай мамиле? Мамлекеттик кызматтын кызматкерлеринин жарандарга болгон мамилеси ушундай болсо, анда билбейм. Бизге окшогон башка жарандардын дагы арыздары келбей калса, алар да кезекке тура албай калышабы?" - деди окурман.