Нарындын борбордук аянтында жаңы жылдык балаты жандырылды

Өлкөнүн 7 дубанынын борбор шаарларында жаңы жылдык балатылардын чырактары жанууда. Буга чейин Бишкек, Ош, Жалал-Абад шаарларында жандырылган. 16-декабрь күнү Нарын шаарында жаңы жылдык балаты орнотулду. Шаарды майрамга карата жасалгалоо үчүн кандай иш-чаралар жүргүзүлгөндүгү тууралуу шаардык мэриянын "Таза-Нарын" муниципалдык ишканасынын башчысы Алмаз Суранов SUPER.KG'ге айтып берди.

"Турдакун Усубалиев атындагы борбордук аянтка 13 метрлик балаты орнотулду. Биз жылда башка шаарлардан айырмаланып, жасалма эмес, табигый балаты орнотобуз. Жергиликтүү бюджеттен жалпы шаар ичин жана балатыны жаңы жылдык жасалгалоого 220 миң сом бөлүнгөн. Мындан тышкары жыл сайын мекемелер арасында имараттарды Жаңы жылга карата жасалгалоо боюнча сынак жарыяланат. Жеңүүчүлөргө атайын байгелер каралган", - деди Суранов.