Орусияда кичи автобуска тандыр жана 26 Кыргыз жаранын салып бараткан айдоочу кармалды

Орусияда 7 орундуу кичи автобуска тандыр жана 26 Кыргыз жаранын салып бараткан айдоочу кармалды. Бул тууралуу жергиликтүү маалымат каражаттары жазып чыкты.

Маалыматка ылайык, Красноярск шаарынын Сибирь трассасынан кызматкерлер тарабынан кичи автобус токтотулуп, текшерүүгө алынган. Текшерүү учурунда кичи автобустун артында атайын текче жасалып ал жактарга да адамдар жаткырылганы аныкталган. Айдоочуга жүргүнчү ташууда эрежелерди бузгандыгы үчүн жана унаанын салонун өзгөрткөндүгү үчүн административдик материалдар толтурулган.

"Жүргүнчүлөр поездге түшүп сапарын улантышкан, ал эми кичи автобус атайын унаа токтоочу жайга токтотулду. Андан сырткары Кыргыз жарандары Орусиянын аймагында мыйзамдуу же мыйзамсыз жүргөнү текшерилүүдө. Кичи автобустун жүргүнчүлөрү мекенине кайтып жатышкан", - деп айтылат маалыматта.

Видеодо кызматкер жүргүнчүлөргө баары коопсуздук курун тагынып жол жүрүшү керектигин айтып, "ушинтип жол жүргөн ыңгайлуубу?" деп суроо узатып жатат. Жол киреге канча акча төлөшкөнүн да сураштырган. Буга жүргүнчүлөр "жол кирени фирма төлөдү, ыңгайлуу эле" деп жооп беришкен.