Сузакта "көрүнгөн жериңе бар" деп ооруп жаткан баланы карабай койгон дарыгер жумуштан айдалды

Жалал-Абадда дене табы көтөрүлүп жаткан баланы карабай койгон педиатр тууралуу видео интернетке чыгып, коомчулукта талкууга алынды. Бүгүн, 21-декабрда ал дарыгер кызматтан алынганын Саламаттыкты сактоо министрлигинен билдиришти.

Коомчулукка тараган видеодо жаш эне уулун көтөрүп алып дарыгер менен урушуп жатканын көрүүгө болот. Жаш эне иш бөлмөдөн чыккан врачты кабыл албаганы үчүн түртүп салганда, ал сөгүнүп кирет. Видеону тартып жаткан кыздын "ооруп келген баланы карабай, башка нерселерди жазып коюп отурушат" дегенин угууга болот.

Дарыгердин "каалаган жериңе бар, балаңды карабайм" дегени видеого тартылып калган.

Саламаттыкты сактоо министрлиги Жалал-Абад облусуна караштуу Сузак районундагы Благовещенск айылындагы үй-бүлөлүк дарыгерлер тобунун педиатры ооруп жаткан баланы карабай койгону үчүн жумуштан айдалганын маалымдашты.

Белгилүү болгондой министрликтин тапшырмасы менен Сузак районундагы үй-бүлөлүк дарыгерлер борборунун жетекчилиги окуяны иликтеген. Жыйынтыгында №11-үй-бүлөлүк дарыгерлер тобунун врач-педиатры А.Э. өз милдетин так аткарбаганы үчүн кызматтан алынган.