Жумгалда аялды жана анын эки небересин өлтүргөнгө шектүү милицияга окуянын чоо-жайын айтып берди

Жумгал районунун Көк-Ой айылында 47 жаштагы аялды, анын 4 жана 7 жаштагы небересин өлтүрүп, өрттөгөнгө шектүү катары кармалган 29 жаштагы Ш.К. аттуу жаран күнөөсүн толугу менен моюнуна алды. Бул тууралуу SUPER.KG'ге ИИМдин басма сөз катчысы Бакыт Сеитов кабарлады.

Анын айтымында, 21-декабрга караган түнү шектүү каза болгон аял менен спирт ичимдигин ичкен.

"Кылмышка шектүүнүн айтымында, ал 20-декабрь күнү 47 жаштагы А.Э. аттуу аял менен анын үйүндө саат 23:00 чамаларына чейин спирт ичимдигин ичкен. Аял мас болуп уктап калганда ал башка бөлмөдө уйкудан ойгонуп кеткен 4 жаштагы кызды күч колдонуп зордуктаган. Ошол учурда жанында уктап жаткан 7 жаштагы И.А. аттуу бала ойгонуп кетип, шектүү баланы муунтуп өлтүрүп, андан соң кызды да тумчуктуруп өлтүргөн. Андан кийин шектүү мас абалында уктап жаткан 47 жаштагы аялды да муунтуп өлтүргөн. Жасаган кылмышын жашыруу максатында бөлмөдөгү мештин ичинен оттун чокторун алып, бөлмөнүн ар кай бурчтарына коюп, анан качып кеткен", - деди Сеитов.

Аталган факт боюнча Кылмыш-жаза кодексинин 97-беренеси (адам өлтүрүү) менен кылмыш иши козголуп, шектүү убактылуу кармоочу жайга камакка алынды. Учурда аталган оор кылмыш боюнча тергөө иштери улантылууда.