Мыйзамсыз дарыгерлик менен алектенген табып Хашим Зайналиев камакка алынды

Мыйзамсыз дарыгерлик менен алектенген табып Хашим Зайналиев камакка алынды. Мындай маалыматты Ички иштер министрлигинин басма сөз кызматы тастыктады.

Белгилүү болгондой, табып тиешелүү лицензиясы жок туруп, бейтаптарды мыйзамсыз дарылоого айыпталып жатат.

"Хашим Зайналиев кечээ, 22-декабрда кармалып, убактылуу кармоочу жайга киргизилди. Ал бейтаптарды кабыл алган үйдө 19 киши дарыланып жатыптыр. Алар арыз жазуудан баш тартышты. "Тез жардам" кызматы ал жерде күзөттө турат. Табып пайдаланган дары-дармектер экспертизага жиберилди", - деди басма сөз кызматкери.

Хашим Зайналиев буга чейин Саламаттыкты сактоо министрлигинин уруксаты жок Бишкектеги Көк-Жар конушуна жеке дарылоочу жай ачып, бир нече жылдан бери адамдарды өз алдынча дарылап келгендиктен ага кылмыш иши ачылып, бирок кайра токтотулган.