"Жылдын супер дебюту-2018" жана "Жылдын супер ыры-2018" наамынын ээси Ишен Назаров: "Өзүмө-өзүм добуш берген жокмун"

Бүгүн, 24-декабрда Бишкек шаарындагы "Бишкек Парк" соода борборунда "Супер-Инфо" жана SUPER.KG порталы уюштурган, колдонуучулардын добушу аркылуу жеңишке жеткен "Жылдын суперлерин" сыйлоо аземи болуп өттү. Добушка маданият жана шоу-бизнес тармагында бул жыл ичинде тыным албай иштеп, тер төгүп эмгектенген ырчы, актриса, вайнер, режиссёрлор коюлган.

"Апакем" ыры менен музыка сүйүүчүлөрдүн жүрөгүнөн орун алып, жыл бою аталган ырды уккандардын оозунан түшпөй жүргөн Ишен Назаров 2 номинациянын ээси болгондугу аныкталды. Ал аткарган "Апакем" ыры "Жылдын супер ыры" жана "Жылдын супер дебюту" наамын жеңип алды. Чыгармачылыктагы жолу ийгиликтүү башталганына кубанып жатканын ырчы мырза жашырган жок.

"Мен добуш берүү башталгандан 2 күндөн кийин билип калдым. Бирок өзүмө-өзүм добуш берген жокмун. Порталга катталганыма жүз күн өтө элек болчу.

Башында жеңериме ишенген жокмун. Бирок добуш берүү аяктаарына 2 күн калганда алдыда келе жатканымды көрүп ишеним пайда болду. Бул сыйлыктар жалпы угармандарымдын жана редакциянын Жаңы жыл алдындагы эң жагымдуу белеги болду. Баарына ыраазычылык билдирем жана алдыда мындай ишеничти актоо үчүн дагы талыкпай эмгек жасайм", - деди Назаров.