Мерген Турганда кош жакшылык: Ырчы 50 жашын белгилеп, небересинин тушоосун да кести

Быйыл ырчы Мерген Турган элүү жашка толду. Бул кутман курагын бүгүн, 24-декабрда белгилеген ырчы туугандары, сахналаштар, досторунун башын бириктирип, борбордогу ресторандардын биринде той өткөрүүдө.

Ырчы бүгүн мааракесин гана белгилебестен, небереси Үмүттүн да тушоосун кести. Тойго келгендер алгач наристенин тушоосун кесип, жолдо тушоо кесүү үчүн жарыша чуркашты. Балдарга оюнчуктар таратылса, жигиттердин биринчи келгени байгеге коюлган кара кочкорду алып кетти. Той түрдүү кызыктуу оюндар менен коштолуп, ырчынын сахналаш достору ыр белек сунушту.

"Бул мааракемди белгилөөнү балдарым демилгелеп, көптөгөн коноктун катышуусунда өткөрүп жатабыз. Кыргызда элден бата алуу деген чоң мааниге ээ, менин 50гө толгонум менен неберем Үмүттүн да тушоо кесүүсү дал келип, кош жакшылыкты бирге белгилөөнү туура көрдүк.

"Эр ортону - элүү жаш" деген жакшы кеп бар. Буюрса, чыгармачылыкта эми күчтөнүп, мурдагыдан да чоң аракет менен иштей баштайм. Ушул тапта Түркиянын маданият тармагы менен да тыгыз иштешип, аз болсо ал жакта ырларым уктурулуп жатат", - деди ырчы.