Кыргыз жеринде туулган Ильзат Ахметов Европанын 50 мыкты жаш футболчусунун катарына кирди

Кыргыз жеринде туулган футболчу Ильзат Ахметов Европанын 50 мыкты жаш футболчусунун катарына кирди. Бул тууралуу УЕФАнын расмий баракчасында жарыяланды.

Маалым болгондой, 50 футболчу УЕФАнын журналисттери катышкан сурамжылоо аркылуу тандалып алынган. Ахметов "Зальцбург" клубунун жарым коргоочусу Амаду Айдара жана "Челси" клубунун коргоочусу Итан Ампадудан кийинки 3-сапта жайгашкан.

"Кыргыз өлкөсүнөн чыккан Ахметов 16 жашында "Рубин" клубунун катарында ойногон эң жаш оюнчу аталган. Өткөн жылдын күз айларында ЦСКАнын негизги оюнчусу катары Чемпиондор Лигасында ойноп, жакында эле 2018-жылдагы Орусиянын эң мыкты жаш футболчусу аталган", - деп жазылат маалыматта.

Мыкты 50 оюнчунун катарына Ахметов менен чогуу ЦСКА клубунда ойногон Фёдор Чалов, "Реал Мадрид" клубунун оюнчусу Винисиус Жуниор, "Боруссия Дортмунд" клубунун оюнчусу Ашраф Хакимилер кирген.

Ильзат Ахметов 1997-жылы Бишкек шаарында туулган. Алгач бишкектик "Алга" футболдук клубунда ойноп келген. Жаш кезинен 11 жашында үй-бүлөсү менен Орусияга көчүп барып, Юрий Коноплёвдун футбол академиясында тарбияланып баштаган. Андан соң Ильзат Ахметов "Рубин" футболдук клубу менен келишим түзүп, 16 жашында "Рубинде" дебют жасаган. 2018-жылы ЦСКА клубуна келген. Азыркы учурда ЦСКА клубунун негизги оюнчусуна айланып, Чемпиондор Лигасында дагы беттештерге катышканга жетишти.