Манас Ниязовдун II Дүйнөлүк көчмөндөр оюндарында кийген формасы аукционго коюлду

Белгилүү улакчы Манас Ниязовдун 2016-жылы II Дүйнөлүк көчмөндөр оюндарында кийген формасы аукционго коюлду. Аукциондон түшкөн каражат толугу менен Дастан Жакеевдин дарылануусуна берилет. Аталган маалыматты Манас Ниязов өзү тастыктады. Бул тууралуу федерация да билдирүү таратты.

Аукциондун баштапкы баасы 2 миң сомдон башталган. Эң чоң сумма сунуштаган адам утат. Уткан адамга Ниязов формасын өз колу менен тапшырат.

Аукционго 18 жаштан жогору курактагылар катыша алат. Жеке өздүк аккаунттар гана катышууга укуктуу.

Көк бөрү федерациясынын маалыматына ылайык, Дастан Жакеев Чүйдүн көк бөрү боюнча чемпиондугунда аттан кулап, катуу жаракат алган. Ал 1999-жылы Ысык-Ата районунда туулган. Азыркы учурда Бишкектеги ооруканалардын биринде дарыланууда. Абалы орто, өз алдынча баса албайт. Ар дайым ата-энесинин көзөмөлүндө.

"Кайдыгер карабаган калың журттан тууганыбыздын дары-дармегине жардам сурайбыз. Көптөгөн кымбат дарылар керектелип, ата-энеси каражат жагынан кыйналууда", - деп жазган аталган федерация.

Аукцион 19-январда саат 21:00дө токтотулат.