Ысык-Көл. "Мейкин Азия" фестивалы аяктады

Ысык-Көл облусунун Чолпон-Ата шаарындагы "Рух-Ордо" маданий борборунда 3 күнгө созулган Эл аралык "Мейкин Азия" фестивалы аяктап, жеңүүчүлөргө сыйлыктар тапшырылды. Баш байгени казакстандык ырчы Димаш Кудайбергенов багындырып, кубок, диплом жана 7000 доллар акчалай сыйлыкка ээ болду. 1-орунду алган украиналык Владислав Левицский 4000 доллар, 2-орунду алган кыргызстандык Ислам Акматов, Курал Чокоев жана тажикстандык Сабина Шамсед 2000 доллар, 3-орундун ээлери кыргызстандык Адилет Азим уулу, орусиялык Христина Дорошенко, кытайлык Ли Чжентао, армениялык Ани Оганесян 1000 доллар өлчөмүндөгү акчалай сыйлык менен сыйланышты. Эске сала кетсек, фестивалдын башында баш байгени алган ырчыга 10 000 доллар бериле турганы айтылган, бирок соңунда баш байгеге 7000 доллар берилди. Бул тууралуу калыстар тобунун төрагасы Муратбек Бегалиев: "2-3-орундарга бир эмес, 3-4 адам ээ болгондуктан, баш байгеге коюлган акчалай сыйлыкты кайра бөлүштүрүүгө туура келди"- деди.