Ысык-Көлдө унаа уурдаган деп 16 жаштагы 2 өспүрүм кармалды. Анын бири мурда да соттолгон

Ысык-Көл районунун Кара-Ой айылында Хонда-Степвагон унаасын уурдап качканга шектелгендер кармалды. Бул тууралуу Жол кыймылынын коопсуздугун камсыздоо башкармалыгынан маалымдашты.

Маалыматка ылайык, 25-январь күнү Каракол шаардык ички иштер башкармалыгына 39 жаштагы жашоочу кайрылган. Ал өзүнүн арызында ушул күнү эртең менен саат 7:00 чамасында белгисиз адамдар анын Хонда-Степвагон үлгүсүндөгү унаасын уурдап кеткенин жазган.

Ыкчам-иликтөө иштери жүргүзүлүп, натыйжада ошол эле күнү саат 16:30 чамасында Кара-Ой айылынан Бишкекти көздөй бет алган Хонда-Степвагон токтотулган. Ал машина арыз ээсине тиешелүү экени аныкталган. Унааны ичинен 16 жаштагы караколдук 2 өспүрүм кармалган. Машина жана кармалгандар милиция бөлүмүнө жеткирилип, сурак учурунда өспүрүмдөрдүн бири буга чейин да уурулук жана тоноо боюнча соттолгону белгилүү болгон. Учурда Каракол ШИИБи иликтөө иштерин улантууда.