Ошто товарларды жалган декларациялап, 1 миллион сом бажы төлөмүн төлөөдөн баш тарткан ишкана аныкталды

“Т” (ред. Бажы кызматы тарабынан аты жашырылган) ачык акционердик коому товарларды жалган декларациялаган. Мындай фактыны Мамлекеттик бажы кызматынын кызматкерлери аныкташканын аталган мекемеден маалымдашты.

Маалыматка ылайык, "БИМИ Ош Сервис" бажылык тариздөө жайында “Түштүк-Батыш” бажысынын кызматкерлери Кытайдан келген товарларды тыкыр текшерүүгө алышкан.

"Анын жыйынтыгында “Т” ААКсы тарабынан берилген товар менен коштоочу документтер боюнча билдирилген товарлардын ылайык келбегендиги аныкталган. Тийиштүү бажы төлөмдөрүнүн айырмасы 1 миллион сомдон жогору болгон. Бул факты боюнча материалдар Ош облустук Экономикалык кылмыштарга каршы күрөшүү кызматына өткөрүлдү", - деп жазылат маалыматта.