Самарканддык аял улуу кызын зордуктап жүргөн күйөөсүн өлтүрдү. Ошол күнү күйөөсү кичүү кызын зордуктоого аракет кылган

Өзбекстандын Самарканд облусунун жашоочусу өзүнүн күйөөсүн өлтүргөнгө шектелип кармалды. Бул тууралуу чет элдик маалымат булактары жазды.

Маалыматка ылайык, сурак берип жатып аял күйөөсүн өлтүрүүгө 18 жаштагы кызын дайыма зордуктай бергендиги, ошол күнү андан кичүүсүн зордуктоого аракет кылгандыгы себеп болгонун айткан. Самарканд ОИИБи 48 жаштагы эркек адамдын жансыз денеси 27-январда табылганын, окуя 26-январда болгондугун белгилеген. Учурда анын аялы камакка алынып, кылмыш иши козголуп тергөө иштери жүрүүдө. Жубайлардын ортосунда жаңжал өтө көп болуп келгени жазылган маалыматта.

"Мен аны "акылы кем" деп атап койчумун. Ал дайыма ичип алып, аялы менен кызын кыйначу. Ал киши өлгөндөн кийин ар кандай ушактар тарап кетти. Маркум улуу кызын дайыма зордуктап жүргөнүн да айтып жатышат. Ал эми ошол күнү мас болуп келип алып кичүү кызын зордуктоого аракет кылган. Муну көрүп калган аялы аны өлтүрүп койгон", - деген ал үй-бүлөгө коңшу жашаган адам.

Шектүүнүн айтымында, күйөөсүнүн бул жоругуна катуу ачууланып ушул кадамга барган. Жубайлардын кичүү кызы 16 жашта. Айрым маалыматтар боюнча, аял күйөөсүн айнек идиш менен уруп өлтүргөн.