Бишкек ШИИББи "Милиция кызматкери 11-класста окуган кызымды зордуктап, күнөөсүн моюнуна албай жатат" деген факты боюнча билдирүү таратты

17 жаштагы кызымды милиция кызматкери зордуктап койду деген билдирүү боюнча Бишкек ШИИББинин басма сөз кызматы төмөндөгүдөй билдирүү таратты.

Маалыматка ылайык, 2018-жылдын 8-августунда Бишкек шаарынын Биринчи Май РИИБине А.Т. аттуу жаран арыз менен кайрылып, анда Бакыт аттуу белгисиз адам 2018-жылдын май айында унаасына жашы жете элек кызды салып алып зордуктап койгону тууралуу айткан. Ал эми ошол эле жылдын 25-августунда Бишкек шаарынын Биринчи Май райондук прокуратурасы Кылмыш-жаза кодексинин 129-беренеси (зордуктоо) боюнча кылмыш ишин козгогон.

"2018-жылдын 16-ноябрында Бишкек шаарынын прокуратурасынын буюртмасы менен райондук прокуратура Бишкек ШИИББине иликтөө иштерин андан ары улантуу үчүн өткөрүп берген. Жабырлануучу деп эсептелген кызга жасалган соттук-медициналык экспертизанын жыйынтыгы боюнча, кызды текшерүүдө денесине эч кандай оор жаракат келтирилбегендиги аныкталган. Мындан соң кылмыш ишин иликтөө токтотулган. 2019-жылдын 20-февралында Бишкек шаарынын прокуратурасы мурда токтогон иликтөөнү жокко чыгарып, 20-февралда Бишкек ШИИББинин тергөө кызматына иликтөө тапшырмасын берген".

Азыркы учурда Бишкек ШИИББинин тергөө тобу ыкчам иликтөө иштерин жүргүзүүдө деп билдирет басма сөз кызматы.