Аламүдүндө табылган ымыркай айына жетпей төрөлгөн. Ал таштандыга ыргытылган

Аламүдүн районунда кечээ кечки саат 19:30 чамасында жаңы төрөлгөн ымыркайдын жансыз денеси табылганы тууралуу маалыматты Чүй ОИИББинин басма сөз кызматы SUPER.KG порталына кабарлаган. Бүгүн окуя боюнча тактоолор белгилүү болуп, басма сөз кызматы толукталган маалыматтарды билдирди.

"Аламүдүн РИИБине болжол менен саат 20:50 чамасында ымыркайдын жансыз денеси табылгандыгы тууралуу маалымат келип түшкөн. Окуя болгон жерге ыкчам тергөө тобу барган. Алар Маевка айылындагы каналдын жанына ыргытылган таштандынын арасынан баштыкка салынган ымыркайдын жансыз денесине күбө болушкан. Ымыркай айына жетпей төрөлгөн 4-5 айлык кыз болгон. Окуянын чоо-жайы териштирилүүдө жана тиешелүү экспертизалар дайындалды. Факты каттоого алынып, сотко чейинки териштирүү жүрүп жатат", - деп билдирди басма сөз кызматы.