Унаанын дөңгөлөгүн чимирилте айдаган шоу-бизнестин айымдары. Ким кандай үлгүдөгү машинанын ээси?

Учурда унаа айдап, руль башкарган мырзалар менен айымдардын саны бирдей эле болуп бара жатканы талашсыз. Алардын катарында шоу-бизнес өкүлдөрү да бар. SUPER.KG порталы көптөн бери рулда отуруп, унаанын дөңгөлөктөрүн чимирилте айдаган атактуу айымдардан учурда кайсы үлгүдөгү унаа айдап жүргөнү тууралуу сурамжылоо жүргүздү.

Ырчы Райкан Абдувалиева учурда 2017-жылы чыккан Toyota Prado үлгүсүндөгү унааны башкарат.

"Тулпарымды 2017-жылы Москвадагы "Тойота борборунан" сатып алгам" деген ырчы алгачкы ирет 1993-жылы рулга отурганын жана ошол кезден тартып унаа башкарып келе жатканын айтат.

Дал ушундай эле унаанын 2005-жылы чыккан үлгүсүн режиссёр Ырыс Жоомартова айдайт. Анын айтымында, бул режиссёрдун жетинчи унаасы.

Кыргыз Республикасынын Эмгек сиңирген артисти Айчүрөк Иманалиева 2014-жылы чыккан Nissan Patrol үлгүсүндөгү унаа айдайт. Аталган тулпарды ырчы ушул жылдын январь айында туулган күнүнө карата сатып алган.

"Эмнеге экенин билбейм, бирок машина айдап бара жатып МАИчини көргөндө колум калчылдап кетет" деген ырчы Назми Байзакова учурда 2006-жылы чыккан Lexus RX330 үлгүсүндөгү унаа айдап жүргөнүн айтат.

Ырчы Анжелика өткөн жылдын декабрь айында 2018-жылы чыккан Lexus NX 300 үлгүсүндөгү унаа алып, аны улуу кызы Айымга арнаганын билдирген.

Жаш ырчы кыз Айдана Дека өткөн жылдын октябрь айында, тагыраагы, өзүнүн туулган күнүндө темир тулпарлуу болгон. Ага ырчынын ата-энеси менен сүйүктүүсү биргеликте BMW үлгүсүндөгү автону белек кылышкан.

Ырчы Үмүтай Абдышова да туулган күнүндө тулпарлуу болгон. Nissan Primerа үлгүсүндөгү унааны ага апасы белек кылган.

Өзүн "Кыргыздын деми" атаган ырчы Гүлзат Мамытбектин унаасынын үлгүсү Honda Civic, жылы - 2007. Ал алгачкы ирет 2004-жылы тулпарлуу болуп, ошондон бери руль башкарып келе жатканын айтат.

Ал эми ырчы Айжамал Кабылова учурда Honda CR-V3 үлгүсүндөгү машина айдайт.

Ырчы Нуркыз Кожонованын учурдагы тулпары 2010-жылы чыккан Honda Accord. Ырчынын айтымында, ал 9 жылдан бери унаа башкарып келүүдө.

Ал эми Мээрим Карыпова 2008-жылы чыккан Toyota Camry үлгүсүндөгү унаанын ээси.

Дал ушундай эле унаанын 2002-жылы чыккан үлгүсүн ырчы Гүлсүн Бостонкулова айдап жүрөт.