ТЕСТ: Бакиевдин "гений" туугандары, Орусияда атылган үй-бүлө, Кимдер династиясы... Үй-бүлөлүк башкаруу тууралуу тесттен өтүңүз

Казакстандын тунгуч президенти Нурсултан Назарбаевдин кызы Дарига Назарбаева өлкөнүн парламентинин төрайымы кызматын ээлейт. Аялы Сара Назарбаева - "Демография" кайрымдуулук фондунун жетекчиси, кызы Алия Назарбаева адабият жана тасма тармагында иштейт, небереси Нурали Алиев - ири бизнесмен.

Өлкө башчы Сооронбай Жээнбековдун кудасынын агасы Ыктыярбек Абжалиев "Мегакомдун" логистика бөлүмүнүн жетекчиси кызматына дайындалып, бир жума иштегенден кийин коомдогу нааразычылыктардан улам өз каалоосу менен жумуштан кетүү тууралуу арызын жазган.

ХХ кылымдын 50-60-жылдары Кубада социалисттик революция ишке ашып, анын башында Фидель жана Рауль Кастролор турган. Бийликке келип, алар өлкөнү 60 жылдай башкарган.

1945-жылы Корея мамлекети экиге бөлүнгөн: Корея Республикасы (Түштүк Корея) жана Корей Элдик Демократиялык Республикасы (Түндүк Корея). Түштүк Корея демократиялык өнүгүү жолун тандаса, Түндүк Кореяны Кимдер династиясы башкарып келет. Алар: Ким Ир Сен (1972-1994-жж.), Ким Чен Ир (1994-2011-жж.), Ким Чен Ын (2011-жылдан тарта). Айрым маалыматтар боюнча, Ким Чен Ындын 2 баласы бар.

Мурдагы президент Курманбек Бакиев анын уулу Максим тууралуу: "Менин балам акылдуу, бизнесмен болсо, мен эмне кылмак элем. Ал мектепте окуп жүргөндө импорттук тамеки сатып акча тапчу" деп айткан. Бул сөзү эл арасында кенен жайылып, катуу сынга кабылган. Бүгүнкү күндө саясатчылардын туугандары жогорку кызматка дайындалып жатканда, "туугандарым "гений" болсо, эмне кылайын" деген сөз эске түшөт.

2016-жылы Тажикстандын Конституциясына өзгөртүүлөрдү киргизүү боюнча референдум өтүп, президенттикке талапкер 35 жаштан эмес, 30 жаштан катышса болот деген норма кирген. Эксперттер бул өзгөртүүнүн максаты - Эмомали Рахмондун уулу Рустам Эмомалиге президенттик шайлоого катышууга мүмкүнчүлүк берүү деп эсептешүүдө. Учурда ал 31 жашта, ал эми атасы 66 жашта. 2017-жылы Рустам Эмомали Дүйшөнбү шаарынын мэри болуп дайындалган. Атасы элдин көзүнчө ага кантип башкаруу керектигин айтып, кеңеш берип турат

Экс-президенттин кызы Динаранын күйөөсү Семетей Султанов өлкөнүн Футбол федерациясын 2012-2019-жылдары жетектеген. Ал кызматка келгенден бери футбол боюнча Кыргыз улуттук курама командасы дүйнөлүк рейтингде 206 кураманын арасынан 196-орундан (июль, 2012-жыл) 91-орунга чейин (декабрь, 2018-жыл) көтөрүлгөн. Кыргыз Республикасынын улуттук курама командасы дүйнөлүк рейтингде 2018-жылдын март айындагы жыйынтыгы менен тарыхый рейтинг жаратып, 40 орунга чейин көтөрүлүп, 75-сапка турган.

2005-2010-жылдары Лех Качиньский Польшанын президенти болгондо, анын эгиз агасы Ярослав Качиньский 2006-2007-жылдары премьер-министр кызматын аркалаган. Алар чоң саясатка келгенге чейин 13 жашында "Айды уурдагандар" тасмасына тартылып, элге таанылган. 2010-жылы президент Лех Качиньский түшкөн учак Орусиянын Смоленский шаарына конордо кулап түшүп, учактагы 96 адамдын баары набыт болгон. Ярослав Качиньский учурда парламенттин депутаты.

Түркмөнстандын азыркы президенти Гурбангулы Бердымухамедов Сапармурат Ниязовдун никесиз төрөлгөн баласы болушу мүмкүн деген кептер бар. Буга алар экөөнүн сырткы окшоштугу, Ниязовдун Бердымухамедовго өзгөчө жылуу мамиле жасаганы жүйө катары келтирилет. Эгер бул версия чын болсо, Ниязов 17 жашында ата болгон. Ал эми оппозициялык түркмөн журналисттери бул версияга ишенишпейт.

2018-жылдын октябрь айында Каракол шаарынын мэрлигине Адыл Каниметов дайындалган. Ал президент Сооронбай Жээнбековдун агасы Жусупбек Шариповдун күйөө баласы экенин айткан. "Ооба, Жусупбек Шариповдун күйөө баласы деген маалымат чын. Жусупбек Шарипов кайнатам болот. Караколдун мэри болгонума ал кишинин тиешеси жок", - деген Каниметов.

Аскар Акаевдин кызы Бермет жана уулу Айдар 2005-жылы парламенттик шайлоодо жеңишке жетип депутат болушкан. Мындан улам оппозиция "өлкөдө үй-бүлөлүк башкаруу режим" орнотулду деп Акаевди күнөөлөшкөн. Ошол жылы төңкөрүш болуп, парламенттик шайлоонун жыйынтыгы жокко чыгарылган.

Владимир Путиндин кыздары Мария жана Катерина мамлекеттик кызматтарда иштебейт. Путин маалымат жыйындарынын биринде кыздары тууралуу сүйлөп жатып, алар бизнес менен да, саясат менен да алектенбегенин айткан. "Алар Орусияда жашайт, орусиялык жогорку окуу жайларында билим алышкан" деген Путин.

2008-жылы эксперттер Гүлнора Каримованы президент Ислам Каримовдун мураскору деп эсептешкен. Бирок 2013-жылдан кийин Гүлнора менен атасынын ортосунда чыр-чатактар башталып, анын өлкөдөгү таасири азая баштаган.

Кыргыз Республикасында 2005-жылы жана 2010-жылы ыңкылап болгон. Анда жарандар президенттин туугандарынын бийликке келгенине, коррупцияга, шайлоонун жыйынтыгын бурмалоого, баалардын кескин кымбатташына нааразычылык билдирип, Бишкектеги "Ала-Тоо" аянтына митингге чыгышкан.