Мирбек Иманбеков: "Жаным" аталышындагы клиптеги имиджим менен чыгармачылыгымды улантпайм. Кийинкиде башка имидж менен чыгам"

Өз учурунун популярдуу ырчыларынын бири Мирбек Иманбеков "Жаным" аталышындагы чыгармасын жаңылап, ага клип тарттырган. Бул клиптен кийин ырчынын күйөрмандары эки жээкке бөлүнүп, бири чыгармачылыктагы жаңылануу деп кабыл алса, бири сынга алган. SUPER.KG порталы ырчыга байланышып, талкуу жараткан клип боюнча жооп алды.

Тыныгуудан кийин чыгармачылыкка кайтып келген ырчы эски ырларын жаңылап чыгуунун үстүндө иштеп жатканын айтат.

"Негизи репертуарымдагы эски ырларды жаңылап ырдап чыгайын деп пландап жүргөм. Мага ырчы Наргиза Айтемирова менен Айпери Суранчиева "Таластык кыз" деген ырымды рэп вариантында аткарып чыгууну сунуштаган. Бирок ал ырды рэп вариантында аткаруу жарашпай калат экен. Ошентип кыздар менен кеңешип ушул "Жаным" чыгармасына токтолдук. Ырды жаздырууну кыздар колго алып, даяр болгондо мага угузушкан. Ыр мага да жагып, Наргиза экөөбүз аткарып чыгууну чечтик. Клиптин сценарийин Айпери Суранчиева менен Наргиза Айтемирова даярдап, мага көргөзүштү. Мен макул болуп, клипти Ысык-Көлдүн түштүк тарабынан тартып келдик".

Ырчы клип тартып жатканда алдын ала айтыла турган сындарга даяр болгонун айтып, буларга токтолду.

"Мен айтаар элем, бул ойлонуп жасалган иш, кеңешип тартылган клип. Рэпти мен айтып көрдүм, бирок окшошподу. Ошондон улам Наргиза Айтемирова айтты. Ал эми кийимим тууралуу айтсам, ал болгону стилдин бир түрү. Жалгыз эле мен костюм-шымдын ичинен көйнөк кийбей жүргөн жокмун. Көйнөктү дагы атайын кийген эмесмин. Клип чыккандан кийин сындар көп болорун билгенбиз. Сын-пикирлер айтылып жатканы жакшы. Демек, күйөрмандар көрүп, угуп жатышат. Мен ушул имидж менен калып чыгармачылыгымды улантпайм. Кийинки клиптерде дагы башка стилде чыгам", - дейт ал.