15 жаштагы кызын зордуктоого шектелген адамдын иши боюнча соттук отурум 23-апрелде өтөт

Өзгөндө 15 жаштагы кызын зордуктоого шектелген адамдын иши боюнча соттук отурум 23-апрелде өтөт. Бул тууралуу SUPER.KG`ге Ош облустук сотунун басма сөз кызматкери Бекзат Осмонкулов кабарлады.

Анын айтымында буга чейин 2 жолу соттук отурум дайындалып, бирок жабырлануучу келе албай калганына байланыштуу жылып кеткен.

"Кылмыш жаза кодексинин 161-беренесинин 3-бөлүгүнүн 1-2-пункттары (жашы жете электерге карата өзгөчө мыкаачылык жасалган, каалабаган кош бойлуулукка алып келген зордуктоо) менен айыпталган М.М.дин жазык иши Өзгөн райондук сотунун өндүрүшүнө 2019-жылдын 12-март күнү келип түшкөн. Ишти кароого жабырлануучу келе албай жаткандыктан буга чейин белгиленген соттук отурумдар болбой калган. Кийинки соттук отурум 2019-жылдын 23-апрель күнүнө дайындалды", - деди Осмонкулов.

Басма сөз кызматкери жабырлануучу кыздын сотко келе албай жаткандыгын, анын жакында көз жарып, төрөтканада жаткандыгы менен байланыштырды.

Окуянын чоо-жайы:

Ушул жылдын башында Өзгөндө өз атасы тарабынан зордукталган кыздын 6 айлык боюна бүтүп калганы белгилүү болгон. Зордуктоого шектелген атасы 20-январда камакка алынып, кызы социалдык кызматкерлерге өткөрүлүп берилгени маалым болгон.

Ал эми Ош шаарындагы "Ак жүрөк" кризистик борборунун жетекчиси Дарика Асилбекова 15 жаштагы кыз 5-апрелде көз жарганын белгилеп, туугандары кызды алып кетүүдөн баш тартканын билдирди.