"УКМКнын кызматкерлери күзөтчүгө бычак сайды" делген окуя боюнча Бишкек ШИИББи маалымат таратты

"Улуттук коопсуздук комитетинин кызматкерлери борбордогу эс алуучу жайлардын биринин күзөт кызматкерин сабап, бычак сайды" делген окуя тууралуу Бишкек шаардык ички иштер башкы башкармалыгынын басма сөз кызматы маалымат таратты.

Маалыматка ылайык, 25-апрелден 26сына караган түнү саат 00:05 чамасында Октябрь РИИБинин нөөмөт бөлүмүнө телефон чалуу келип түшкөн. Анда Б.Э. аттуу жаран белгисиз бирөөлөр тарабынан сабалганын, окуя борбордогу "Бахчай" кафесинде болгону кабарланган.

"Окуя болгон жерге ыкчам-тергөө тобу келип, шектүү жарандарды кармаган. Бул факты Кылмыштардын жана жоруктардын бирдиктүү реестрине катталып, 266-берене "бейбаштык" боюнча сотко чейинки өндүрүшкө алынган. Тергөө иштери жүрүп жатканда жабырлануучу болгон Б.Э. тарабынан тосмо арыз келип түштү", - деп билдирет басма сөз кызматы.