ТЕСТ: Ата-энесинин жолун жолдогон шоу-бизнес, маданият өкүлдөрү. Кайсы белгилүүнүн баласы Данияр Эрматовду кумир тутат?

Кыргыз Республикасынын Эмгек сиңирген артисти Самара Каримованын уулу Барсбек Данияр Эрматовду кумир тутат. Ал жакында эле Данияр Эрматовдун репертуарындагы "Билем жактырасың" чыгармасын ырдап, ага клип тарттырды. Самара Каримова чыгармачылык Барсбектин окуусуна, билим алуусуна кедергисин тийгизбесе, анда ырчы болушуна каршы эмес экенин билдирген.

Кыргыз Эл артисти Шахра Талипованын "кыздарым менин жолумду жолдоп келе жатат" дегени бар. Гүлзат Батырканова ырчылыктан тышкары "Сармерден" көрсөтүүсүндө шайыр жеңенин милдетин аткарып келген. 2015-жылы жол кырсыгынан каза болгон. Ал эми Кыял Батырканова дагы сахнага апасы, бир тууганы менен ырдап чыккан.

Кыргыз Эл артисти Курмангазы Азыкбаевдин кызы Нурайым ырчы, скрипкачы. Ал эми музыканттын кенжетайы Нурсултан дагы ырчы катары таанымал. Нурсултан Азыкбаев Орусиянын "Жаңы толкун-2016" жаш ырчылар сынагына мекенибиздин атынан катышкан.

Жаш ырчы Кылыч Эдик "Айкөл" тобунун ырчысы, жетекчиси Кеңеш Эдиктин уулу. Кылыч Эдик 2012-жылы атасы каза болгондон кийин анын атын өчүрбөйүн деп ырчылыкка багыт алган. Канат Култаев түптөгөн "Заман" тобуна кастинг аркылуу өткөн. Ал жакта 6 айдан ашуун убакыт жүрүп, үй-бүлөлүк шартына байланыштуу топтон кеткен. Учурда жеке ырчы катары ырдап жүрөт.

Атасынын атын өчүрбөй, ырларын кайрадан жаңыртып ырдап жүргөн Кубаныч Сатаев - баарына белгилүү болгондой, залкар ырчы Чубак Сатаевдин тун уулу. Ал Кыргыз Эл артисти Саламат Садыкованын күйөө баласы.

Кыргыз Эл артисти Гүлшайыр Садыбакасова 1973-жылы түзүлгөн "Шоола" ансамблине кастинг аркылуу өтүп, урма аспапта ойногон. Топ 7 жылдан кийин таркап кеткен. Окууну аяктагандан кийин Оштогу педучилищеге мугалим болуп келип, кыздардан турган ансамбль түзүлүп жатканын угуп, топко кошулуп кеткен. Топ "Кыз-Бурак" деп аталып, бүгүнкү күнгө чейин ырчыларды таптап келет. Ал эми Гүлшайыр Садыбакасованын кызы Сайкал дагы апасынын жолун жолдоп, аталган топтун ырчысы болсо, учурда "Кыз-Бурактын" жетекчиси.

Ырчы, обончу Алтымыш Кадыров менен актриса, журналист Рая Нургазиеванын уулдары Талант жана Самат атасынын атынан 2005-жылы 60`К деген топту негиздеген. Топто Кайрат Примбердиевдин жубайы Эля Примбердиева дагы болгон. Бут тосуулардан кийин топ тарап кеткен. Кийинчерээк Талант Кадыров топтун атын өчүрбөйүн деп кайрадан ырдап чыккан.

"Бир элес", "Асыл тумарым", "Вера в любовь" деген ырлары менен таанылган ырчы Абир Касеновго ырчылык өнөр чоң атасынан өткөн. Тагыраагы, Абир Касенов - Кыргыз Эл артисти, төкмө акын, комузчу, актёр Орозбек Кутманалиевдин небереси.

"Ак куу", "Шок кыз", "Сезим" ырлары менен таанымал болгон ырчы Айпери Кубик кызынын атасы Кубик Калыков экени белгилүү. Кубик Калыков куудул жана ырчы. Анын репертуарындагы "Той, той", "Жаным", Асел Турдалиева менен аткарган "Нан жок" жана башка ырлары популярдуу болгон.

"Жаңы толкун-2012" сынагынын катышуучусу Бек Исраилов дагы чыгармачыл үй-бүлөдөн тапталып чыккан. Анын атасы Жолдошбек Исраилов - композитор, апасы Гүлмира Рыспаева – акын. Бек Исраилов 2015-жылы композитор Аскар Карыбаев менен ырчы Чолпон Алсеитованын кызы Айжаркынга үйлөнгөн.

Эстрада ырчысы Ильяз Андаш таланттуу адамдардын үй-бүлөсүнөн чыккан. Атасынын кесиби актёр болгону менен "Бакай" тобун түзүп, айылдан чыккан жаш таланттарды таптап келген. Аталган топ Ысык-Көл облусунун дээрлик жарымына популярдуу болгон. Ал эми Ильяз Андаштын апасы музыкалык мектепте комуздан сабак берет.

Кыргыз Республикасынын Эмгек сиңирген артисти Динара Акулова менен Абдумалик Шерматовдун кызы Малика Дина дагы сахнаны тандаган. Малика Дина өзү айткандай, апасынын курсагында жаткан кезинен эле сахнада жүргөн. Ал ар кандай сынактарга катышып, эл оозуна алынган.

"Шорпо" десе баары Жаныбек Алыкуловду таанышат. Учурда Алыкуловдун атын өчүрбөй, жолун улап келаткан эки уулу бар. Алар Алмаз жана Манас Алыкуловдор. Аталаш бир туугандар шоумен катары таанымал.

Кыргыз Республикасынын Эмгек сиңирген артисти Расул Маматкуловдун кызы Айгерим кичине кезинен эле атасын жандап бийлеп, учурда жеке ырчы катары белгилүү. Ал эми уулу Руслан ыр жаздырып, клип тарттырып, учурда тыныгууда. Расул Маматкуловдун көкүрөк күчүгү Аяна дагы атасы менен дуэт жаздырып, шоу-чөйрөгө кадам таштаганы маалым.