Азиз Батукаевдин абактан бошотулушу боюнча дагы 3 дарыгер камакка алынды

"Мыйзамдагы ууру" Азиз Батукаевдин ишин иликтөөнүн алкагында дагы 3 дарыгер камакка алынды. Бул маалыматты SUPER.KG порталына Кыйноолорго каршы күрөш боюнча улуттук борборунун орун басары Динара Саякова тастыктады.

Анын айтымында дарыгерлер 6-май күнү убактылуу кармоочу жайга киргизилишкен. Ал эми бүгүн, 8-майда алардын баш коргоо чарасы каралат.

"Кармалгандардын арасында Жазаларды аткаруу мамлекеттик кызматынын медицина санитардык башкармалыгынын мурдагы жетекчиси, Саламаттыкты сактоо министрлигинин кызматкери Б.К. жана №47 колониянын борбордук ооруканасынын башкы дарыгери А.Ф.", - деп билдирди Саякова.

Буга чейин Батукаевдин иши боюнча дарыгер Эмил Макимбетов жана лаборант Ирина Цопова камакка алынган.

2013-жылдын 9-апрелинде Нарын шаардык соту Батукаевди "айыккыс дартка чалдыкты" деген жүйө менен бошотуп, ал ошол эле күнү өлкөдөн чыгып кеткен. 17-апрелде башкы прокурор Өткүрбек Жамшитов Жогорку Кеңеште отчёт берип жатып, "мыйзамдагы уурунун" иши январдан баштап кайра каралып жатканын билдирген.